陳僖儀留憾 霆鋒嘆可惜
一場車禍，令入行僅兩年的陳僖儀（Sita）被死神帶走，結束了26年短暫的人生。Sita突然離世，圈中人無不悲慟，她早前接受本集團節目《娛樂onShow》訪問，卻成為她生前最後一個訪問，期間她自爆一直是謝霆鋒的粉絲，有次在首映碰見，因怕醜不敢上前打招呼，事後感後悔。而霆鋒對於這位差點可成同事的粉絲不幸身亡，昨日大嘆可惜！
昨日凌晨二時許，下着滂沱大雨，當很多人仍在熟睡中，歌手陳僖儀卻魂斷公路，Sita經搶救後傷重不治，結束了26年短暫的人生。不少認識Sita的人都覺得她是個樂天女生，但原來她一直收埋自己，她生前接受本集團節目《娛樂onShow》訪問，表示有很多心願未完成，自細是謝霆鋒粉絲的她，原來一直想跟偶像見面。
未能簽約英皇
在訪問中，Sita被問喜歡哪位型男？她熱情說：「由細到大都好鍾意霆鋒，有次喺首映見到佢，有人話可以安排我同佢見面，當時唔知點解，我刻意走開避開佢，仲同自己講唔好啦，佢好忙o架，其實我唔想畀佢第一個印象，就係覺得我煩。」就是這個決定，Sita便錯過大好時機，她也萬料不到機會就只得這一次。
記者昨致電霆鋒，對於Sita離世，他心痛說：「聽到覺得好可惜，佢係一個好有潛質嘅新人，唱歌好好聽，又唱得又作得，為佢英年早逝而感到惋惜。」原來Sita原本有機會與霆鋒成為同事，據知三年前Sita入行前，有人介紹她給英皇高層霍汶希（Mani）認識，當時Mani帶Sita唱K試音，Sita的歌藝令Mani印象深刻，原本已過關簽約英皇，可惜當時Sita因另有經理人合約，致未能順利簽約英皇。Mani也承認此事：「係，聽到呢個消息好傷感，因為有過幾面緣，佢差啲簽約英皇，更令我覺得傷感。」
喜歡拖手感覺
在《娛樂onShow》訪問中，Sita又自爆小時曾咬傷人，更咬到對方入醫院，她說：「我自小就硬頸，讀幼稚園時張枱唔畀人過界，隔籬同學就係咁過界，我警告過佢三次，最後都係過，咪一嘢咬落去，咬到佢隻手瘀晒，要即刻入醫院，最後當然畀家長投訴，畀阿媽鬧咗好耐。後來知道個同學係左撇子，佢都唔想頂到我，真係唔好意思。」
Sita原來也喜歡拖手的感覺，尤其是拖妹妹的手，她說：「我係個冇安全感嘅人，所以我鍾意拖妹妹隻手，但因為我多手汗，佢唔鍾意畀我拖，惟有拖爹哋隻手。」只可惜Sita走了，這一拖永遠也握不緊。
文：專案組