陳慧嫻回歸樂壇 阿倫嘲似八両金
今年入行30周年的歌手陳慧嫻將重返香港樂壇，並將「陳慧嫻x寶麗金」這對經典組合重現眼前，剪了「冬菇頭」的她昨日在記招宣布好消息，不過到場祝賀的譚詠麟（阿倫）不但「唔識貨」，更笑她新look似足八両金，令她反寸阿倫冇fashion sense。
久未在港露面的陳慧嫻昨日開記者會，宣布重投香港唱片公司懷抱，成為環球唱片公司重開「寶麗金」後首位加盟的女歌手。明顯悉心打扮的慧嫻大騷美腿，又在台上笑言自己「條命欠金」，到場祝賀的阿倫則乘機搞爛gag說：「寶麗金咪一塊金，雖然金價跌緊，但始終都會升番嘅！」又乘機追擊剪了冬菇頭髮型的慧嫻：「你個頭成個八両金咁！」
唔識high fashion
問到慧嫻會否嬲阿倫口不擇言？她大方地講笑說：「佢唔知呢啲係high fashion啫！我好鍾意呢個頭，小學二年級都剪過。」身為一姐的她否認以高價簽約寶麗金：「我對呢個品牌好有情意結，一講即刻心郁，簽咗三年約。」她又指今年是入行三十周年，但已十年沒出新碟，故正籌備一連串大計：「今年內會出隻廣東唱片，其實上年開始已經申請紅館檔期開演唱會，不過啱啱先知道得8月個期，唔係好夠製作時間，希望下年可以搞到。」
「有冇教育意義吖」
阿倫被問到曾志偉日前在迪士尼舉行「成人派對」大唱粗口歌時，他即劃清界線說：「唔知佢哋咁高興喎！我十一點半先到，玩咗四十分鐘度走咗喇。」沒有一同上台唱「粗口歌」會否覺得可惜？阿倫反問道：「你話有冇教育意義吖！」
文：音樂組