青霞閃爆 掃鑽冇上限

林青霞昨晚出席卡地亞最新高級珠寶晚宴，身穿貼身珠片裙的她身材玲瓏浮凸，並戴上價值2400萬的珠寶，閃爍動人，難怪她一到場即風騷問記者：「我似唔似明星？人一世有好多角色，前幾日我做慈母，今日着得咁靚晚裝同珠寶，就做明星。」又笑言很享受出席是次晚宴。對於記者大讚她身材豐滿，青霞只笑不語，至於是否養尊處優而心廣體胖？她笑說：「我寫作都好辛苦，（你身材好玲瓏！）見你哋要食少啲，跑下步。」問青霞喜歡甚麼類型的珠寶，她即自爆：「今晚有條價值一億九（千萬）嘅鑽石，一定要睇，我19年前結婚時，喺拍賣會見過價值100萬美金嘅藍鑽，當時覺得好貴唔理佢，點知今日呢個一億九（千萬），早知當時買咗粒藍鑽。（1億對你嚟講好濕碎？）1億對邊個都唔係濕碎，（叫老公送？）算啦，佢唔做咁足戲。」

經常夢見哥哥

問到青霞早前買下了卡地亞的王冠，她透露原本想買給兩個女兒結婚時用，但她們似乎沒有興趣，故打算留待自己60歲時戴。問她買珠寶的金額有沒有上限？她說：「冇，睇緣分，買得起唔肉痛咪買。（老公畀你張卡都冇上限？）我花自己錢，唔係花老公錢。」此外，提到哥哥張國榮早前逝世十周年紀念，她坦言經常夢見哥哥，在夢中哥哥常靜靜坐在一角。而青霞繼女邢嘉倩就比青霞遲一點到場。

蔡志明與太太恩愛到場。	太子珠寶鐘錶主席鄧鉅明夫婦盛裝打扮出席。	青霞繼女邢嘉倩比青霞遲一點到場，同樣省鏡。

蔡太冧爆收錶

玩具大王蔡志明與太太蔡李惠莉同來，蔡太透露腕上的品牌手錶是由老公所送：「冇特別話點解送，見到啱咪買，咁先好呀。」她謂老公買珠寶給她，她就以買衫回敬老公。提到兒子蔡加讚和汪圓圓的婚事，她表示：「多數圓圓搞，加讚成日飛。」至於圓圓去完上海就病倒，會否叫二人暫時不要作「近距離接觸」？她笑言會提點一下。至於時裝設計師鄭兆良則與一名女伴到場，並稱若圓圓要求，會為她親自設計靚靚婚紗。

青霞獲邀與卡地亞港澳行政總裁Arnaud Carrez（右）及卡地亞區域（北亞洲）行政總裁陸慧全合照。	時裝設計師鄭兆良與芭蕾舞家Grace結伴出席。	蔡綺蓮（右）與友人Anne不約而同性感上陣，十分搶鏡。

文：名人組