梁靖琪壓力爆煲 喪喊甩髮

【克服流言】

入行9年的Toby，父親貴為無綫高層梁家樹，外界認為她在父親的扶助下，演藝事業發展理應更加得心應手，偏偏「人言可畏」四個字，令Toby自困沖涼房喪喊，Toby坦言做人最重要「問心無愧」！

「入行初期，人哋因為我爸爸係無綫高層，搞到有好多gossip（是非）嘅說話我聽，仲試過有人喺我微博整啲合成相，將我個頭key去啲好核突猥瑣嘅相度，搞我好唔開心，講真老竇無得揀！我試過喺沖涼時自己匿埋喊，專登開大啲水喉唔畀屋企人聽到，不過我學識做人最緊要問心無愧。4年前我開舖頭做Wedding planner後，冇聽到咁多gossip，可能因為人哋知我唔係靠呢行搵食，依家我都當演戲只係興趣！我知道自己唔係天生演戲嘅材料，到依家都會跟老師學做戲。早前喺劇集《戀愛季節》中飾演『男人婆』客貨車司機，有觀眾讚我演得入型入格，證明我努力無白費。」

因父親為無綫高層梁家樹，令梁靖琪被指靠父蔭上位。	梁靖琪（左二）曾為組合「女生宿舍」成員。	梁靖琪曾因生意壓力導致甩頭髮，幸好她學懂凡事要放鬆。

【拒做少奶】

2011年底Toby下嫁出身富裕家庭的老公黃敏豪，不過被認為嫁得「金龜婿」的Toby卻無諗過要過「少奶奶」生活，更直言「唔使老公錢」！

拒做少奶的梁靖琪樂意做家務，更不要求老公畀家用。	湯盈盈把囡囡交給愛湊Ｂ的梁靖琪照顧，大可放心！	性格熱情的Toby曾與羅仲謙傳緋聞。

「我冇諗過要過少奶奶生活，我同老公都係各自管理自己嘅財政。老公從來冇畀過家用我使，而我亦無要求佢咁做！我哋兩公婆聯名開一個戶口，大家一齊儲錢就ＯＫ囉！就算平時水電雜費都係邊個記得交就主動去交。我有能力可以照顧自己，點解要畀對方壓力？老公打理製衣生意嘅壓力唔會比我少。雖然外界一直話我哋好有錢，但事實唔係咁。如果真係外界講得咁有錢，我哋都唔使咁辛苦做生意儲錢啦！」

【變女強人】

為證明自己的實力，Toby由演員變身商界女強人主理婚禮策劃，事業及家庭兼顧的她在高峰期每日只能睡兩小時，不過她亦自爆曾因壓力爆煲導致甩頭髮！

「雖然做藝人開舖頭可以慳番筆宣傳費，但服務性行業都要面對好大壓力，試過有無理客人竟然恐嚇話要搵記者投訴，我亦試過handle客人壓力大到甩頭髮，好彩學識咗做人最緊要放鬆啲！雖然打理生意、拍劇都已經好忙，但我都堅持自己打理屋企嘅家務，我亦會買餸煮飯畀老公食。我係一個好energitic（積極）嘅人，只要我無嘢做就身痕，好開心搵到一個同自己性格好夾嘅老公，佢同我一樣咁勤力！」

【未敢生B】

在外國讀書長大的Toby除了「入得廚房、出得廳堂」之餘，原來更是「湊B達人」，但因被不少小朋友不幸自殺的新聞嚇怕，深明為人父母的難處，未敢貿然生B。

「我其實好鍾意小朋友，平時都會睇書學湊BB，連我家姐嗰兩個BB都可以話係我湊大。年尾我仲會幫湯盈盈同錢嘉樂湊囡囡，到時佢哋去環遊世界，我就努力湊B。雖然身邊好多好姊妹都生咗BB，但我未諗過幾時生，因為供書教學好大壓力！有時睇新聞，見到啲小朋友因為讀唔成書就去跳樓，令我好心痛。我好想同老公做好晒做父母準備後，先諗生BB嘅問題，依家可以玩住朋友個仔嚟滿足湊仔嘅欲望。而且老爺奶奶亦都從來冇畀過壓力我要生仔，我依家只係30歲，將來都應該仲大把時間可以生嘅！」

性格率直懶理緋聞

「鬼妹仔」性格的Toby最近先後與吳卓羲及羅仲謙傳出緋聞，不過身為「人妻」的Toby直言「行得正、企得正」無懼緋聞，鏡頭後的Toby不論男女都可以輕易打成一片，性格率直熱情的她與大家攬抱亦只屬正常的打招呼。訪問期間Toby更經常不期然吐出一、兩句流利英語，心直口快總比矯揉造作來得痛快！

口述：梁靖琪

筆錄：李佩珊

影：劉智源