鵬哥紅館試咪 詹Sir單挑「老年Pi」
「扮嘢始祖」盧海鵬和棟篤笑高手詹瑞文拍住上，將於6月14、15日，一連兩日踩入紅館開扮嘢歌舞騷，兩大扮嘢高手聯手，務求令觀眾笑爆肚。今次的世紀合作，主辦人丘亞葵表示：「鵬哥扮嘢好有代表性，同詹瑞文傾今次合作時佢都好興奮，好想挑戰一下鵬哥。」
以假亂真
年屆71歲的鵬哥原來是首次踏足紅館開騷，為了令他的紅館處男騷搞得有聲有色，丘亞葵將努力讓鵬哥的扮嘢功夫完全釋放：「我哋諗咗好多方案，例如鵬哥好鍾意試咪，就畀佢初嘗紅館試咪。」鵬哥入行幾十年，扮盡一眾紅人紅星，例如徐小鳳、達明一派、羅文等，故騷上鵬哥亦再度惡搞圈內藝人，重現多個經典人物。主辦單位更有意請來正牌藝人上台，和鵬哥真真假假鬥一番：「如果鵬哥拍達明一派，希望可以搵到真嘅達明上來一齊來。」
「浸住」開騷
由於主打惡搞扮嘢，主辦商有意從內地邀請一眾有「明星相」的山寨明星到場搞噱頭，據知頭炮是兩位主角惡搞的電影《少年Pi的奇幻漂流》主角，化身「老年Pi」拍攝海報，更考慮因應造型將紅館變成一個大海洋。問到二人的酬勞？丘亞葵表示兩人好「順得人」：「同鵬哥識咗廿幾三十年，所以錢方面好易傾，而詹Sir對今次合作好有興趣，所以錢都未傾就話做咗先算。」
文：音樂組