陳靜邵音音兩輩較量低俗絕配

今屆香港電影金像獎最佳女配角的提名人相當「多元化」，入圍者包括陳靜（DaDa）、資深演員邵音音與金燕玲、內地女星江一燕及台灣歌手范曉萱，老中青共冶一爐。

比金馬獎更鼓舞

年紀最輕、24歲的DaDa憑甚具爭議性的電影《低俗喜劇》入圍，片中她飾演為上位不惜為電影人提供「特別服務」的奀星「爆炸糖」，演出破格打破花瓶印象，去年入圍台灣金馬獎，亦被視為金像獎大熱之一。DaDa直言能首度參與這影壇盛事已夢想成真：「細個好鍾意睇戲，冇諗過可以參與，可以同咁多前輩同場真係好開心。今次喺自己土生土長嘅地方得到認同，比上次（金馬獎）更大鼓勵，好似發夢咁！」

提到與兩屆女配角得獎者邵音音同樣憑《低》片出戰，有否信心揮低前輩？DaDa說：「音音姐叫我唔好同佢爭，我梗係唔敢啦！但之後佢提議一齊拎，如果係咁就最好，話唔想得獎都係假，不過其他提名人都好犀利，我唔敢諗太多，總之部戲愈多獎就愈開心。」

做Gym備戰頒獎禮

DaDa表示身邊朋友都給予鼓勵，但同樣令她壓力大增，問到如何備戰？她笑言首要任務是減肥：「新年食多咗，拍戲時同事買好多嘢食嚟探班，之前又病冇體力做運動，最近開始搵健身教練陪我做Gym，同埋慢慢節食，唔可以一下子唔食嘢，我係要有食物先有動力做嘢嘅人。」

最佳女配角候選名單

邵音音 《低俗喜劇》

陳靜 《低俗喜劇》

江一燕 《消失的子彈》

金燕玲 《逆戰》

范曉萱 《聽風者》

場地：都會海逸酒店

飾物：SingleLifeDS

文：立影　

攝：沈健程