惠英紅首爾拍戲掃面膜要緊
南北韓戰爭似即將爆發，有關方面為免禍及外國人，昨日宣布制訂應急及疏散計劃。正於首爾進行外景拍攝的電影《冬戀望日》，除韓星趙瀚善外，還有本地影星惠英紅。昨日小紅接受長途電話訪問表示市面一切平靜：「都聽到有啲人講到好緊張，收到消息時，第一個反應係『係咪真o架』！後來問當地人，佢哋仲喺度笑，因為對呢個南韓開戰講咗90幾次，本來就冇放喺個心度。（買機票走？）唔會，個個走應該都冇位，有事到時先算啦！」已於當地逗留了幾天的她首天已四處購物，單是買面膜已花了港幣一萬多元。
導演胡偉成亦透露當地人如常過日子，拍攝進度順利，當地工作人員更沒提及有關報道：「佢哋話唔係我哋講都唔知，套戲拍埋今日市區，聽日就會拉大隊去山區拍，預計到月中先返香港。」監製馮煒源則表示曾為事件與韓國製作公司及演員經理人商量，眾人未有過分擔心。他謂：「呢邊報道呢件事嘅媒體唔多，反而香港緊張啲，同埋都冇叫人走，就連男主角趙瀚善都唔驚。」
