李添勝寸爆山聰 情聖冇佢份
陳山聰與賭王千金何超雲盛傳分手，還被指四圍抓撈，曾與山聰合作過的「金牌監製」李添勝，昨日出席新劇活動時揚言會再次起用山聰，雖不擔心對方形象差翻不到身，但也不忘揶揄謂：「搵佢做情聖實死，騎呢角色就一定冇問題！」
陳山聰自兩年前跟賭王千金何超雲相戀後，即放低工作，做跟得男友與超雲遊山玩水，但近日盛傳「雲聰戀」玩完，超雲更飛到倫敦購物散心，並不時把戰利品的照片與網友分享。昨午5時許，她又於Instagram上載一張粟米片早餐相，似心情輕鬆，相反山聰則被指近日積極四出抓撈，又搬回昔日居所麗晶花園，但昨日未見其蹤影。
「我對佢有信心」
曾與山聰合作過劇集《天梯》的李添勝，昨聯同新劇《神探高倫布》演員黎耀祥、敖嘉年、陳明恩、唐詩詠等宣傳。問他若山聰「回歸」會否預留角色給他？添哥謂：「佢返公司實用佢，不過佢未搵我，上一次見係2、3個月前喺公司撞到。（話佢失戀抓撈！）關我咩事？（佢做戲OK？）《天》劇角色第二個做唔到佢嘅神韻。拍套劇時佢談戀愛，佢都拍晒先走，我對佢有信心。（驚唔驚佢形象差翻唔到身？）冇所謂，係佢私人問題。（如果觀眾唔想睇呢？）搵佢做情聖實死，做騎呢角色一定冇問題，但未有適合劇本。」
敖嘉年咀「鬼妹」
嘉年則與「鬼妹」陳明恩於新劇演夫妻，談到二人一張咀嘴劇照中他疑似觸及明恩胸邊，嘉年稱：「角度問題啫！我完全唔知。（驚畀人話鹹豬手？）話都冇計，不過明恩拍咀戲好純熟，講中文仲好過香港人。（錫鬼妹有咩感覺？）一樣，只係成日撞到個鼻。」明恩就透露因獻出螢幕初吻，故拍攝前十分緊張。
文：影視組