琦琦遇槍客 引女兒脫險
名模琦琦趁復活節假期與女兒任晴佳（Ella）到維也納遊玩，竟在公園遇上神秘佗槍男子，幸好琦琦臨危不亂帶女兒逃出險境，前晚母女乘夜機返港，華哥獲悉後心急見母女，親自到機場接機，甫見女兒安全抵達，即抱抱呵番。
前晚8時許，華哥已身在機場等候太太女兒，期間有fans要求合照，雖然華哥心急接機，但仍有求必應。他說因自己首次執導的電影已進入後期製作，故是次未能跟琦琦母女同遊維也納。當他看見妻女步出閘口後，即開心得上前攬實呵番坐在行李車上的女兒，並幫手推行李車。
戴着太陽眼鏡的琦琦，因坐長途機關係，面帶倦容，她更透露在當地差點遇上危險，她說：「有日我同Ella去公園玩足3個鐘，突然間，我見到有個男人褲袋插住支手槍，即刻好驚，唔敢同Ella講，驚Ella會望住個男人，怕有眼神接觸有危險，我咪作狀叫Ella追住我，跑到好遠先敢同Ella講。以前我喺度住咁耐從未見過有人佗槍出街，所以真係好驚。」
幸母女倆有驚無險，但因為避開神秘男子，兩人卻迷了路。雖然如此，她說此行Ella還是很開心，因當地天氣反常沒料到會下大雪，讓女兒度過一個難忘的白色復活節。對於禽流感疫情擴散，琦琦說見當地有很多白鴿，故與女兒到公園玩耍時，也要女兒先戴上手套，玩完即棄，她說返港航機上，也見不少港人佩戴口罩，認為港人警覺性很高，故也不太擔心。
首執導筒過癮
另外，華哥透露早前為首執導的鬼片到大陸長白山拍外景，對於內地H7N9禽流感疫情持續擴大，他說：「唔擔心，最緊要衞生啲，平時食嘢都好小心嘅，唔驚得咁多。」其電影已進入後期製作，雖然捱了多個通宵加上無限壓力，但依然大呼過癮，他說：「因為拍戲已經好多時冇覺好瞓，到有瞓覺時間，瞓上床就不停諗點樣拍得好啲，個腦無辦法停，同做演員好唔同，演員只要做好本份，導演要安排構思所有嘢。」為拍出香港特色的電影，在電影中加入賽馬情節，並在大陸訂製了木馬作道具。
文：名人組