千語做阿四 箍實林峯
「無綫chok王」林峯與19歲的吳千語愛得甜蜜，更有傳已好事近，可惜最近林峯長駐內地拍劇，遙距談情又如何抵得住相思之苦，難得林峯前日返港出席活動，千語BB自然把握機會黐到實，見她全程做阿四細心服侍愛郎，實行鋪好路做硬「峯嫂」！
無綫小生林峯及影壇新貴吳千語自年初高調承認拍拖以來，已多次橫跨歐亞旅遊「預支蜜月」，更有傳婚期不遠，猶如「分開一天也天冧」，可是現實是殘酷的，最近林峯要留守橫店拍劇集《陸小鳳與花滿樓》，兩人相隔異地已半個月，只靠電話及短訊維繫感情，愛得癡纏的他們自然心癢癢唔夠喉，難得前日林峯返港出席佛教活動「人間音緣梵音禮讚」，並留港一晚，千語BB當然不會放過良機，低調見愛郎爭取見面。
猶如貼身保母
19歲的千語BB樣靚身材好，成功收服「不羈的峯」，還令男友死心塌地賜名分，相信她自有一套馴仔術！前晚千語又再出招，悉心打扮的她紮起辮子更顯清秀，於綵排時全程黐實愛郎宣示「峯嫂」地位，只欠沒有派卡片作自我介紹，見她為男友遞水及遞紙巾表現細心。當林峯與法師閒談，千語即退後兩步任男友慢慢傾，甘做「背後的女人」，夠晒大體，且目光一直沒有離開愛郎，一副含情脈脈模樣！活動開始後，千語亦「收埋」自己，讓男友在台上表演及做訪問。
林峯表示首次參加大型佛教音樂會，雖不是勤力教徒，但心中有佛：「今次應星雲大師邀請出席，我大時大節或者去廟宇拍嘢會上香，但未至於初一、十五食齋。」提到禽流感H7N9，他表示在內地開工時甚少吃雞及豬：「唔使拍嘢會返房，唔會周圍去。（叫千語唔好探班？）有叫佢最好唔好上嚟。」完騷後，林峯為避耳目，沒有乘坐用開的座駕，而轉坐另一輛車離開。
怕男友「偷食」
至於千語昨日出席now TV十周年活動，她直認有把握機會與林峯短聚，對於被男友禁返內地，她說：「我應該唔去，但準備咗啲食物畀佢帶返去，可以自己煮，唔使出街食，佢好為食，叫咗佢唔好亂食嘢，尤其內臟。」對於被大會安排與肌肉男合照，問到是否享受？她笑言擔心他們凍親，期間梁思浩突然指千語於年內結婚，她即表示還年輕，結婚是很遙遠的事，至於林峯是否結婚對象？她說：「佢好好，對小朋友好有愛心！」
文：影視組