杏兒篤胸咀女 Bosco:唔方便講

胡杏兒去年與拍拖8年的黃宗澤（Bosco）斬纜，期間曾與內地影星于波及台灣影星黃少棋傳緋聞，惟統統非其心目中那杯茶，故她揚言會暫時事業行先，感情事則順其自然，不過表面上似不在乎的她，實情芳心寂寞，近日就不時被拍到她與女性友人訴苦。

打開心口任睇

上月22日凌晨時分，杏兒被《好報》發現與一名短髮女友人於中環酒吧談心，當晚伊人一副鬱鬱寡歡模樣，不停向短髮女訴苦，短髮女除了很有耐性聽取外，還不時輕撫杏兒膊頭及大髀，期間杏兒看似情緒激動失控，並雙手掩面痛哭，短髮女見狀即細心安慰，又遞上紙巾，一輪過後才令杏兒平復過來，短髮女為氹杏兒開心，即轉移話題談護膚，又伸手輕撫杏兒面龐，杏兒未有迴避，還顯得相當受落，未幾心情又變回開籠雀講個不停，還突然拉開衣領指住自己胸部，短髮女亦有忍不住手指指，更有樣學樣打開心口，兩女並一度玩互篤胸口，看來關係非淺。

胡杏兒（左）	兩女在酒吧內談心，更一度互玩篤胸，女友人更打開心口任睇，杏兒一臉受落。	杏兒（左）跟女友人當街咀嘴，並與女友人手拖手在街頭漫步。

至凌晨2時多，杏兒與短髮女才結帳離開，心情好轉不少的杏兒還手翹短髮女同步往街頭等的士，當有的士駛近時，杏兒卻一副依依不捨模樣，並拖實短髮女向前走，期間耳語片刻後，兩人還情不自禁當街咀嘴，再抱抱後才肯登車離開。

胡杏兒（右）	Bosco	《好報》昨日獨家踢爆杏兒受情傷後疑「轉性」報道。

解話goodbye kiss

對於被指轉口味喜歡同性，杏兒昨日接受訪問時否認：「梗係唔係，當晚只係約咗個中學同學見面，都冇喊到，我依家好開心。（你哋互篤胸喎！）我哋係講緊乳癌問題啫！（咁當街嘴對嘴kiss呢？）呢個係禮貌式goodbye kiss嚟o架！」

身在橫店拍攝劇集《神探狄仁傑》的Bosco，直言舊愛思想西化，有goodbye kiss亦屬正常，問到杏兒有否致電他訴苦？Bosco謂：「冇，最近冇傾電話，都唔喺香港。（信唔信佢會鍾意女仔？）唔知呀！況且都分開咁耐，又唔係男朋友身份，唔方便講咁多。（有冇擔心？）呢個問題已經唔到我答嘞！」