區文詩GYM出女人味
歌手區文詩（Angela）最近「升呢」做跳唱歌手，化身性感女王，大晒誘人女人味，為保持完美的線條曲線，她更頻頻進出健身室，拉筋、拱橋、舉機都做到足，難怪操到索晒氣的Angela都笑言：「感覺真係好青春呀！」
歌手區文詩（Angela）早前推出派台新歌，最近更密鑼緊鼓排練新舞，日日跳到腰痠骨痛的Angela表示：「新歌帶點韓國風，可謂勁歌熱舞，而且我有一段solo，係咁踎低起身跳，真係痛咗好幾日。」
為求盡善盡美，Angela更大手筆請來健身教練，她說：「依家每個星期至少練兩次，每次都會練氣加健身，因為件舞衣都算少布，所以要保持完美的體態。」教練亦大讚Angela相當有恒心，而且進度理想。
男友支持
眼見Angela拉筋、拱橋、舉機樣樣做到有板有眼，閒時可有與男友做GYM作樂？Angela興奮地說：「佢簡直係高手，一星期起碼做三次，佢都好支持我呀！」
雖然如此，Angela卻笑言自己不及當年勇，她說：「同十年前喺Cookies嘅時候比，體力真係冇咁好。不過咁日練夜練令我諗番起當年九個女仔一齊嘻嘻哈哈嘅日子，感覺真係好青春。」
Angela又大賣關子，透露自己會在新歌中以新形象示人，她說：「今次呢隻歌好重女人味，仲帶點sexy嘅女王feel，同以前賣可愛好唔同o架，大家要留意！」
文：音樂組