露雲娜強勢回歸騷quali

七十年代少男偶像露雲娜（Rowena），5歲入行做歌手，6歲灌錄第一張唱片，成為香港樂壇史上年紀最輕的歌手，更揮低溫拿樂隊奪歌唱比賽冠軍，自此演藝路一帆風順。13歲便打破金唱片銷量，Rowena與歌后鄧麗君及許冠傑等齊名，難怪連樂壇大姑媽Elton John亦甘心為她作歌！少年得志，又見盡圈中紅星名人，難得Rowena能夠保持一顆純真的心：「細個見到咁多哥哥姐姐，我又冇諗過佢哋嘅身份，只係覺得佢哋都係鍾意唱歌啫。不過諗番以前自己又真係幾勁喎，但又會覺得呢個唔係自己。」

24歲嫁人封咪

當年Rowena得獎無數，威到連日本最佳新人獎亦是她的囊中物，直言日本粉絲的熱情最令她意外：「當時第二次去日本，點知一落飛機就見到好大塊banner歡迎我，無諗過自己一個妹妹仔都可以有咁大影響力，真係受寵若驚！」憑住煞食鬼妹仔外形，Rowena輕易俘虜一眾少男的心，但她卻在24歲時為了一個男人而告別樂壇：「做咗咁多年嘢，我覺得好攰，加上當時遇到我前夫，好想擁有自己嘅家庭生活，就決定退出。」

露雲娜與陳奕迅合唱，一較歌藝。

賈思樂開心邀得露雲娜出山。

全身音樂細胞

一心相夫教子的Rowena，幾乎斷絕與圈中人來往，就連出街遇上歌迷亦不相認。直到2009年，老友賈思樂力邀她出山，令她重新感受上舞台唱live的熱誠，翌年陳奕迅又與她合唱一曲《講男講女》，她說：「初時我想拒絕，不過入到錄音室唱歌時，即feel到全身嘅細胞都跟住節奏郁，我嘅spirit好似飛咗上天咁，當時同自己講點可以唔唱歌，我真係好鍾意唱歌！」觀眾反應熱烈，即令Rowena復出的心大爆發，終於在今年成事，即將有機會出碟之餘，又打算開演唱會過足癮，明天更會在《勁歌金曲》演出。

文：專案組

攝影：李廣成

場地：馬天尼娛樂