家蔚逼天明瞓梳化
剛為人母的周家蔚和陳自瑤（Yoyo）昨日出席商場兒童節揭幕禮，談到近期病毒H7N9肆虐，兩位媽媽都已做足防備措施，家蔚更表示每日都會用消毒藥水為小TJ抹身。談到老公洪天明6月要上橫店拍劇3個月，問到天明回港時會否隔離他？家蔚說：「我嘗試叫佢瞓梳化，因為我哋依家都係同個仔瞓，就算佢會都係為個仔，唔係為我。」談到早前天明在微博上載了TJ跟湯盈盈囡囡Alyssa的同床合照，家蔚笑言：「係呀，佢哋青梅竹馬。（如果佢哋大個拍拖？）要睇吓個仔頂唔頂得順佢啲公主病喎，因為錢嘉樂真係好錫個女。」
天明在電話訪問中則稱不會因病毒而拒接內地工作：「不過我會盡量少食雞、鴨。（唔介意分房瞓？）為家人、為自己，有唔舒服就去醫院Check清楚先返屋企。」