Stephy 撐「老爺」ready做方太

Stephy與方力申拍拖多年，感情穩定，Stephy前晚更特別捧「未來老爺」場，出席由小方父親為畫家楊明義舉辦的書法展，小方母親及弟弟亦有現身，但小方則因身在內地未能出席。只見Stephy滿場飛，除密密與小方家人傾偈外，又獲小方家人頻頻介紹朋友給她認識，關係甚佳，看來Stephy一早已過小方家人一關。

讚Uncle健談

Stephy受訪時直言與Uncle（小方父親）已見過很多次，彼此亦有共同話題：「Uncle好健談，教我好多嘢，令我獲益良多，之前都有去過Uncle開嘅畫廊！」問到同樣喜歡藝術的Stephy可會投資畫作？她說：「上年啱啱買咗第一幅，用咗5位數，但對我嚟講唔算投資，藝術品係因為鍾意先買。（Uncle教你點揀畫？）梗係同Uncle一齊去買！佢有幫手揀，個畫家嘅作品係Uncle代理，畀咗友情價！（新抱價？）我哋都係好朋友！」提到她與小方經常分隔異地，Stephy直言已長大，而且拍拖多年，故不用時常見面，亦不會檢查男友。

Stephy跟小方父母及畫家楊明義（右二）滔滔不絕。	小方弟弟介紹朋友給Stephy認識，並幫忙合照。	與小方的合唱歌曲被製成明信片版畫像，Stephy愛不釋手。

有「意外」會結婚

問到有否試過被小方父母催婚？她笑說：「梗係冇！催都唔係催我。（有結婚打算？）冇傾亦冇計劃，比較隨緣。（如果時間啱會突然結婚？）可能o架！」雖然Stephy未有結婚打算，但原來她卻恨生B：「我想生小朋友多過結婚，恨做媽咪。（接受未婚生B？）未去到咁大膽，會有社會壓力，同埋我都想小朋友喺正常家庭長大。（唔會防備有BB？）呢個時候唔想有住，但如果有BB都會順其自然同結婚。」

文：音樂組