城城誓圓帝夢再成家
郭富城花了10年時間專攻電影事業，至今仍未成功登上金像獎影帝寶座，難怪城城笑言先立業後成家，揚言要待成功得獎後才考慮結婚生仔。同場張家輝自封「影壇鐵漢」，但坦承怕老鼠曱甴多過怕死屍。
城城與家輝合演寰宇新片《同謀》上映在即，二人昨午到觀塘apm出席宣傳活動，與觀眾大玩遊戲，場面熱鬧。城城接受訪問時被問到有雜誌指他床頭「擺簫求子」，他澄清謂：「支筆喺人哋度，笑吓咪算囉。（想生仔？）暫時都係工作為主，我拍戲努力咗10年，到依家都未喺本土攞過獎。（《寒戰》冇提名好多人戥你唔抵。）多謝媒體同觀眾對我嘅支持及安慰，但會尊重大會嘅決定，冇任何怨言。（《寒戰2》拍嘅時候再添壓力？）唔會，我對自己嘅演出其實好有信心。」
城城直言倘若本屆金像獎邀他出席的話，自己會盡量配合參與，十分大方。他又半開玩笑指自己誓要在香港得獎後才考慮成家問題，似乎大考緋聞女友熊黛林的耐性。而現場所見，城城已將頭髮染回黑色，與「爛桃花」劃清界線，他卻表示：「呢啲嘢過咗去唔講嘞。」
家輝有童年陰影
城城與家輝在馬來西亞拍外景期間，曾遇上不少蛇蟲鼠蟻「突襲」，城城知道拍檔「忌諱」，不時主動打死曱甴，又大步行嚇走老鼠，十分貼心。記者取笑家輝細膽，他反駁謂：「我有童年陰影呀，況且會傳播病菌嘛。我繼王羽之後稱得上『影壇鐵漢』，好似我做警察時，試過有次見到有人墮樓，行埋去見佢攬住件冷衫，點知原來係爆咗肚，腸肺等流晒出嚟我都冇驚。」
對於首次與城城合作，家輝揚言已默契十足。當問到拍戲期間有否見到城城的紅顏知己現身探班，家輝抵死謂：「冇喎，我都想問吓佢點可以搞得起緋聞，我搞咗幾十年都搞唔掂。」引得全場大笑。
文：影視組