JJ包食住行 蜥誘樊少皇
賈曉晨（JJ）與樊少皇打得火熱，更於女方香閨同居，兩人甜蜜地養了龜及一缸魚做「愛的寵物」，日前他們又心癢癢，殺入寵物店為屋企添新成員，今次主要睇蜥蜴，並糖黐豆地揀足45分鐘。
賈曉晨自從去年被爆戀上動作男星「力王」樊少皇後，兩人一直愛得癡纏，早前《好報》踢爆樊少皇為冧女友，大改形象，一洗以往的土味，打扮跟足韓星。樊少皇近日甚至進駐女友香閨，過着同居生活，又揸女友辣跑出入。日前下午4時半，穿緊身皮褸的樊少皇和JJ結伴落樓，由男方任司機，揸JJ的日產戰神GTR白色跑車出街。
兩人直往太子，到埗後樊少皇先落車，接着跑去另一邊幫女友開車門，然後齊齊步入一間專賣龜及蜥蜴的店舖。其實早在拍拖不久，樊少皇為冧JJ，已共同養了一竇豹紋陸龜及一缸魚，兩人時不時在微博「憑龜」寄意。當日他們似想再為屋企添新成員，除了睇龜，另一個目標便是豹紋蜥蜴。
自動自覺埋單
JJ做足跟得女友，陪樊少皇仔細研究，更取出手機為蜥蜴拍照，不時冧爆甜笑，而樊少皇則全程雀躍，對着蜥蜴箱指手畫腳，期間眼見JJ睇到彎晒腰，為免女友走光蝕底，樊少皇即捉實其手臂提醒。
兩人於寵物店睇足45分鐘，及至一名男友人來會合，樊少皇和JJ始捨得離開，出發到尖沙咀，一行三人食晚飯，席間有講有笑，食至約7時，JJ自動自覺去埋單，然後獨自駕車離開，留下樊少皇和友人再趕下場，認真識做。
文、攝：追蹤組