陳嘉桓 OT冇錢收
陳嘉桓、林韋辰及筱靖等昨日錄影亞視新節目《星動亞洲》，適逢負責製作亞視前節目《娛樂CIA》的傳訊媒體製作，遭路芙及鄭啟泰等五位主持入稟小額錢債審裁處，追討欠薪約五十萬。陳嘉桓說：「我入行以來，從未試過收唔到錢，係早排拍戲收唔到OT錢，但成組人都冇，我當攞經驗，冇所謂。」
路芙等五人昨早現身灣仔小額錢債審裁處，據悉，五人與傳訊媒體製作簽訂合約，但工作半年，上月《娛樂CIA》突遭腰斬，惟傳訊媒體只支付約半數合約服務費用，各人被拖欠約兩至逾十萬元。路芙說：「一路電話追，一路話『老闆搞緊其他數』、『下星期先出到』。」她指眾主持為節目努力，盼討回公道。亞視助理副總裁（製作）冼偉智回應：「唔係亞視冇畀錢，係IMEG（傳訊媒體）負責製作同請人，同亞視冇關。」