張兆輝呻直踩30粒鐘好戲難做
藝人張兆輝與徐子珊前日為新劇拍外景，在馬路上演一場高速追車戰，險象環生！兩人更全程冇用替身，認真搏命！而早前右耳受傷的張兆輝坦言已漸康復，但因劇集拍攝緊密，需連拍三十多小時而大發牢騷！
前日張兆輝與徐子珊為無綫新劇《神槍狙擊2013》在大埔工業邨拍攝外景，出名是「女車神」的子珊載着張兆輝上演一場緊張的追車戰。駕着黑色辣跑的子珊從後高速追住一輛貨van，突然一輛貨車迎面而來而急煞車，十分驚險！兩人親身上陣拍攝，更一take過完成整場戲，十分專業。
耳傷已結焦
張兆輝事後受訪時表示對子珊駕車技術有信心，又謂有武術指導在場，故並不擔心，他笑言：「冇咩好驚，最多咪撞埋去囉。」問到早前拍攝被玻璃碎擦傷右耳，他表示康復進度良好：「個傷口已結焦，不過呢排可能感冒，所以身體狀態麻麻。呢排為劇集埋尾，拍攝安排太密喇，我今朝開06（清晨6時）拍外景，拍到夜晚7點返廠繼續拍，直踩到聽朝（昨日）9點又拍外景，一直到夜晚，成三十幾個鐘。拍戲都冇咁辛苦。」頗有微言的他續道：「好似唔理你哋（演員），務求完成咁，咁樣又點會有好嘢？」
另外，同場的子珊則表示雖然過去有賽車經驗，但因為今次有乘客在旁，所以感到壓力，她說：「因為隔籬有個人（指張兆輝），咪驚啲囉。」她又說附近多人踏單車，怕有途人衝出馬路，所以分外小心。
文：專案組