楊愛瑾等代表作安心嫁人
前女子組合Cookies成員楊愛瑾（Miki）與「永安太子爺」郭永淳的緋聞傳足數年，即使時常被拍得出雙入對，但仍不承認戀情，她坦言不怕被偷拍，但就介意指她「被包養」，強調自己是一個連的士也不捨得搭的「慳妹」！從不渴望做少奶奶的她，雖不排除「閃婚」的可能性，但卻希望於婚前能先於影壇有代表作。
愛舒淇紅氈時裝
前女子組合Cookies成員楊愛瑾（Miki），不經不覺出道已逾10年，從part time model進身Cookies，到現在全力進軍影壇，但無論她多麼努力，觀眾的目光都不自主地投向她與「永安太子爺」郭永淳的緋聞上。二人的緋聞傳足數年，更不時被拍得「撐枱腳」，甚至與雙方的家人聚餐，親密關係不言而喻。
雖說做藝人要「食得鹹魚抵得渴」，但連私生活亦要被人評頭論足，難免感到難受。難得Miki都能看得開，更坦言私生活不會為此而受影響。「我明白做呢行，好多嘢都要畀人知，我都唔介意人哋影。」她更阿Q精神地笑言要時刻保持最佳狀態，以防被狗仔隊拍下醜態，而眼鏡就是遮醜的最佳工具：「我平日唔使開工都會懶得化妝，所以會戴眼鏡嚟遮吓，呃吓自己。我好多時都會戴好大副嘅黑色平光鏡，但屋企都有唔少喺眼鏡邊有花紋或者bling bling嘅眼鏡，貪佢有啲款又唔會太誇張。」
鍾情型格黑白灰
作為藝人，時常有機會以不同的造型現身，尤其出席頒獎禮時，更會隆重其事地穿上高貴的晚裝，把女性的嫵媚盡顯。Miki坦言每次見到舒淇行紅地氈，目光都會不由自主地落在她身上，而每每最令她印象深刻的造型，都是出自Valentino的手筆。「佢成日都着唔同嘅晚裝出席頒獎禮，性感得嚟又高貴大方，凸顯到佢嘅氣質。最記得佢有一年着咗lace tube dress，又一次着咗品牌最有代表性嘅紅色長裙，真係好優雅，搞到我都變埋品牌嘅fans！」
而私服方面，她坦言自己有別於平日亮相的「日本娃娃」造型，反而鍾情於沉實的黑、白、灰色調，大走型格路線，但當中帶一點女性化的打扮，法國品牌Isabel Marant就最合她的口味！但她笑言衣櫃裏總不能只有名牌服飾，作為一個精明的女生，應該要懂得買一些價錢平民化的衣服，然後mix & match出個人風格。她笑言：「我好鍾意去Zara買嘢，貪佢啲款跟貼潮流，而且設計又夠basic、百搭！」而她的修長美腿正正是她的「撒手鐧」，她說：「我最鍾意短裙、短褲襯短靴，款式都係愈簡單愈好，因為我唔想人哋覺得我太girly，好似好柔弱咁。」
被包養？作大控訴
Miki即使外表如何故作堅強、硬朗，但慘被郭永淳的前妻指摘，更公開直斥她是「狐狸精」！面對種種流言蜚語，光憑想像，就能感受到Miki所承受的巨大壓力。但她對於感情事一直都三緘其口，默默承受種種壓力。對於外間對她的批評，Miki只無奈地說：「我唔係接受，只不過係冇辦法。唔係事實嘅嘢我唔想再講，亦都無需要回應。」
自認慳家擠巴士
雖然從不承認戀情，但Miki不時被拍得穿得身光頸靚出入名店，卻是不爭的事實，難免令人覺得她受到郭永淳的包養。對此，她作出極大控訴，並強調自己是「慳妹」一名。她說：「其實我平日真係好慳家，有時我要拎好多化妝品或者衫去做嘢。就算我拖住個篋又拎住紙袋，都會選擇搭巴士再轉港鐵！咁我當然都有搭的士嘅時候，但係都係晨早開工，又或者着住好高嘅高踭鞋先被迫搭。」
結婚？要嚟就嚟
既然生活如此逼人，難道Miki就不想當一個「賺錢買花戴」的少奶奶嗎？她坦言自己是一個工作狂，假如要她待在家中，必定會悶得發慌。但對於婚姻，她坦言目前沒有想過，但卻不排除「閃婚」的可能性。她只淡然地表示：「幾時結婚我唔知，話唔定好快，不過暫時冇呢個計劃。我唔會諗咁多，諗得太多反而會唔開心，呢啲嘢要嚟就嚟。我依家都係希望喺工作上有代表作，滿足到自己先再諗其他嘢。」
現正全力進軍影圈的Miki對美國女星安妮希芙威（Anne Hathaway）讚不絕口，笑言自己是對方的頭號粉絲。安妮所演出的電影角色如《走佬俏公主》中的活潑主公、《蝙蝠俠——夜神起義》中的型格貓女俠、《孤星淚》中我見猶憐的窮妓女，Miki都統統熟讀，更視安妮為奮鬥目標：「佢無論做咩角色都好似，而且從來唔會被定型，覺得佢就係故事中嘅主角。佢做貓女俠嗰陣真係好型、好似好打得咁。我睇完之後，自己都好想試吓做『打女』！」
加盟鄧漢強旗下
剛簽約到《寒戰》監製鄧漢強旗下電影公司的Miki，正式轉型為演員，目標於影壇大展拳腳。Miki坦言與鄧漢強識於微時，她首部擔正做女主角的電影《B420》，正正就是對方首部執導的電影。她笑言：「我哋兩個識咗八年，一直都有聯絡。因為佢知我對電影好有興趣，而我咁啱又同舊公司約滿，所以就決定一齊合作。」她雀躍地表示公司現正為她度身訂造劇本，電影預計於年中開拍，望能於影圈打出名堂！
拍海味變好姊妹
首次參與無綫劇集的Miki，非常幸運地與偶像周海媚（海味）合作，更飾演對方的妹妹。她笑言自己與海味亦師亦友，閒時除了交流演戲心得，更會互相交換護膚及化妝心得。二人因此劇集而結緣，成為好姊妹，故真正演出時亦更得心應手。Miki亦不禁大爆海味於片場的「蝦碌」事，笑言：「佢因為喺北京拍戲拍得多，所以成日都一開口就好自然講咗國語，有陣時仲要唔發現講錯咗添，哈哈！」
採訪：龔凱欣
攝影：吳文聰
髮型：Vince（I1 Colpo）
化妝：C. Long
化妝品：Cyber Colours
服裝：Snidel、Como
眼鏡：Flair、Ed Hardy、Diesel