Ana R.唔怕醜示愛
無論熱戀的甜蜜或是失戀的痛苦，都難以理智去對待，當回想起時，確實做了不少傻事，Ana R.為追求心儀對象，完全唔怕醜，大庭廣眾示愛，最後「得米」。但失戀時，有一千種理由不想見人，宅男女神苟芸慧選擇收埋自己，不見天日，才覺有安全感。
Ana R.
細個時試過喺火車月台等緊車時，見到對面月台有個男仔我好鍾意，見當時冇車嚟緊，我就鼓起勇氣大聲嗌過對面，大聲同佢講『我叫Ana，我電話係咩咩咩』叫佢搵我，結果我哋真係一齊咗，拍咗兩年拖。
姚書軼
讀書拍拖時好興摺幸運星，我日日摺，摺咗成個月，之後一次過送晒畀男朋友。
陳嘉容
做過好多傻事，例如同男朋友通宵喺公園傾偈，連續三個月開夜車織冷衫畀佢。
陳逸璇
失戀時，試過將對方好鍾意嘅手繩剪到碎晒，剪完就走人，佢好嬲，我就覺得好爽，之後再不停搵朋友訴苦。
貝安琪
我失戀會不停食嘢，特別係甜品同雪糕，食甜嘢會令人開心番啲，之後再不停做運動，出一身汗。
陳僖儀
失戀時會唱卡拉OK，試過周圍搵朋友陪我唱K唱通宵，之後幾日唔見人，喺屋企望住個窗不停喊。
何傲兒
試過甩拖6年後，有晚凌晨好感慨，想聽吓舊男友把聲，打電話畀佢又唔出聲，佢喺電話喂咗成10秒先收線。
苟芸慧
我失戀會唔食嘢唔瞓覺，試過連續3日不眠不吃，個人好depress（抑鬱），淨係想有個私人空間，喺屋企用被冚住自己，先有安全感。