囡囡「直腸直肚」嘉樂喪換片

剛為人父的錢嘉樂昨日出席活動時示範手抱9個大的嬰兒兼餵奶，豈料他除了將BB的襪仔fing甩，更身痕兩頭擰，結果BB誤被咪扑中，當場大哭，他隨即做鬼臉，成功氹回BB哈哈大笑。嘉樂透露囡囡已由其父改名為「錢凱晴」，當中「凱」字有領域寬闊、有希望的意思。他又坦言還未懂換尿片，幸有太太（湯盈盈）協助：「不過我哋不停換完片後，抱起個女又『砵』過，一個鐘差唔多換4次以上，太太都話佢腸胃似足我。（兩公婆瞓唔到覺？）盡量瞌下，雖然瞓好少，但有個目標（指湊女）係開心嘢，幾enjoy！」問太太胃口是否仍很大？他謂：「因為要餵人奶，佢唔可以咁快減肥住，遲啲先做瑜伽修身。」