何基佑愛得煙韌無視情人節
無綫藝人兼節目主持何基佑與太太結婚一段時間，但仍經常「糖黐豆」拍拖逛街，恩愛到爆，而兩人做事亦很有默契，如不少情侶都愛慶祝的節日，他們兩公婆卻一致地多年來都不會慶祝，何基佑表示：「好似情人節咁，食飯、買花都會貴咗好多，商業味道重過節日嘅意義，所以我哋咁多年都無去慶祝，不過，咁啱上個月嘅情人節喺農曆年初五，新年假期比較得閒，我同老婆都有諗住去超級市場想買塊牛扒煎吓，點知賣晒，最後買咗個加熱就食得嘅羊腩煲做晚餐。」
何基佑除了電視工作之外，最近亦有為電台開咪，為了做足準備頻頻在家中度稿，相當勤力。