Crystal爆情史 向哥哥致敬
女子跳舞組合HotCha成員張紋嘉（Crystal）不但唱得、跳得更演得，日前她與創作人徐羨曾（阿徐）一起綵排舞台劇，他們互爆對方瘀事，而Crystal更自爆情史，笑言中學時期陪男友瘋狂追星！
今年是一代巨星張國榮（哥哥）逝世十周年，為了向哥哥致敬，Crystal將飾演哥哥的忠實粉絲與創作人阿徐攜手演出舞台劇，Crystal表示：「我喺《勁金歌曲2誰比你重要》入面飾演哥哥嘅忠實粉絲，而阿徐就係我嘅男朋友，為咗我而陪我一齊追星，睇晒哥哥所有嘅演唱會！」Crystal更大爆現實生活中曾為前男友追星：「我自己未試過追星，但讀中學時就試過為男友追星，佢好鍾意Twins，我當時就陪佢睇晒所有Twins嘅演唱會！」
開心有得加場
Crystal第三次與阿徐合演舞台劇，今次可謂駕輕就熟，與阿徐相處多時的Crystal更大爆阿徐的秘密：「阿徐好大汗！每次演出時佢都好用力，加上又要唱歌、跳舞，運動量好高，所以每次見到佢成身濕晒，啲汗滴晒落地下時我就要忍住笑，但台下嘅觀眾就見唔到阿徐咁大汗，我真係忍笑忍得好辛苦，哈哈！」而阿徐亦不甘示弱表示：「Crystal喺台上好有自信，但佢平時份人好緊張、好驚青，好記得綵排時，我試過蝦佢，專登突然爆肚，嚇到佢口窒窒唔識反應！不過好彩佢on show時就完全無問題！」
Crystal坦言開心得到觀眾的認同：「雖然我演出舞台劇嘅經驗唔算非常豐富，但今次《勁》啲飛一開售就賣晒，依家仲可以喺三月廿九日加開一場，真係好開心！」。
文：李佩珊
攝：謝國華
髮型：Jamie @ Hair 服裝：MONKI