娜姐包上頸 梁政珏贏「透」
周秀娜昨日以女主角身份出席新片開鏡，裙褂look包到上頸的她，遭谷胸𡃁模鍾采羲及巧露裙底春光的無綫小花梁政珏夾擊博搶鏡，聲稱失眠的娜姐，認真冇覺好瞓。
周秀娜、杜汶澤、彭浩翔、梁政珏及「爆E超蓮」鍾采羲（Iris）等，昨日到西貢出席王晶導演新片《爛滾夫鬥爛滾妻》開鏡儀式。娜姐與片中老公杜汶澤以中式禮服亮相，密實收咪的她，慘被谷出3吋事業線的𡃁模Iris搶鏡，穿上喱士連身裙真空上陣現波形的無綫小花梁政珏，坐下時更巧露通花lace底褲洩春光，引得傳媒爭相拍攝，成功搶鏡，令近日疑因情傷未愈，在網上聲稱「失眠太久」的娜姐傷上加傷。疲態畢露的娜姐說：「呢排好忙，兩套戲疊住拍，有啲攰。（以工作麻醉情傷？）嘢一定要做，又冇人養我！（有指你出街包到實，冇面見人？）出街梗要着衫包住㗎！我冇唔開心，好好胃口，拍呢套戲有得食、有得聽阿澤搞gag、劇情又講我好多仔食！」
預告半裸任睇
Iris受訪時否認存心博搶鏡：「我周身肥膏，周秀娜咁瘦，點搶？（點解唔聽杜汶澤講除褸影相？）留番啲精彩嘢喺戲度啦！我半裸戲都奉獻咗畀呢套戲，（露點？）拍嗰時黐晒嘢，唔會見到。（想博做晶女郎？）睇吓有冇咁嘅福氣，我每個鏡頭都好努力。」梁政珏則稱：「我戲入面冇Iris咁性感，性感嘢交晒畀佢啦！」
杜汶澤則感激王晶新戲明醒他，他搞笑說：「王晶好過我老竇，我畢生夢想就係同娜姐拍戲，多謝佢成全，100場戲有50場親熱戲，估唔到我做完影帝做咗『杜錦江』，同徐錦江睇齊！（主動NG？）一百幾十次少不免！我主動全裸添，但導演唔要，我遮番之嘛！」
文：影視組