蔣怡佗B女 南非嫁翁狄森
藝人蔣怡（CoCo）與珠寶設計師男友翁狄森（Dickson）的擬結婚通知書前日曝光，雖然Dickson前日表示排期只是「貪得意」，又指婚期要往後推，令人費解。但昨日Dickson突然向傳媒發布二人於上月在南非的結婚相，又驚爆蔣怡已佗女5個月，並早在2011年已經擺酒！
蔣怡與翁狄森拍拖13年，二人的擬結婚通知書前日才曝光，但一對新人已於上月18日，在南非Kruger國家公園的Beyond Ngala Tented Camp舉行婚禮，並由南非牧師做主持，於蔣父及狒狒見證下圓婚，二人更有別傳統，戴上由兩條草捲成的婚戒。
行禮當日，穿上白色貼身婚紗的蔣怡已懷孕4個月，但腰枝依然纖幼，完全無孕味，出席賓客只有蔣父、酒店員工及岸上的一群狒狒，而兩人在行禮前，與蔣父先在馬達加斯加度蜜月12天。
昨日記者致電Dickson，問到前日為何不認已行禮？他解釋：「打草驚蛇咗，一早係諗住今日（昨日）發相，尋日南非啲相未到手，所以冇認到。」他又稱太太懷孕並非意外，是計劃之內，他笑說：「我哋一早諗住大住肚結婚，先度蜜月，再行禮，因為想先苦後甜。行禮地方要好靚好浪漫嘅地方，蜜月地方係一個好落後嘅地方，咁就好完美！」認真反傳統。
兩條草做婚戒
他又透露早於2006年向蔣怡首次求婚失敗，2011年再度求婚才成功：「喺2011年8月4日已經擺酒，我爸爸當時有癌症，佢想我快啲結婚，爸爸上年2月過身，呢兩年來好忙，所以依家先搞自己真正婚禮，畀CoCo一個夢寐以求嘅婚禮。（用草做戒指？）係用兩條草做，用牙線箍住，其實我哋都唔會戴婚戒，訂婚戒指就係我整，用2.68卡做嘅鑽石戒指，取其好意頭易陸發。」
至於蔣怡昨日承認現時已懷孕5個月，並佗着女嬰，預產期在7月：「初期反胃唔想食嘢，所以肥唔到，依家已過咗呢個階段，未懷孕前是55kg，依家57kg。」她說整個婚禮都是由丈夫安排，自己全不知情，笑言不知道自己的婚戒是一條草！
此外，曾瞞婚的模特兒陳祉妤稱他們必有私人原因才不認結婚：「我覺得冇所謂，兩人開心就得。」而名模陳嘉容及姚書軼亦認為始終結婚是開心事。
文：名人組