盈盈早產 誕嘉樂餅印女

湯盈盈於本月10日下午約12時半，於港島嘉諾撒醫院透過自然分娩，誕下7磅3安士女兒Alyssa。B女頭髮多多，精靈可愛。昨日盈盈在老公錢嘉樂陪同下，在醫院外分享喜悅。自然分娩的盈盈康復程度相當理想，精神相當不錯，只是腹部依然隆起。頭戴冷帽披頸巾的她，與嘉樂十指緊扣受訪，嘉樂更四度親吻太太，場面溫馨。盈盈透露已聘請「陪月」，將會暫時休息做全職媽咪，並會餵食人奶。

入產房剪臍帶

嘉樂透露太太預產期本為3月17日，但10日凌晨見她有所「動靜」，至清晨7時將她送院，至下午便順利誕下Alyssa。他笑言原本計劃不進產房，以實現童年時幻想只在產房門口等待熄燈一刻，但最後經不起護士催逼而走入產房，見證了重要時刻。嘉樂憶述當時太太在產房內猶如拍動作片，自己立即動作導演上身教她呼吸，他說：「佢好似用錯力喺塊臉度，我教佢要好似『屙砵砵』咁。姑娘就叫我正面睇，但我有啲保留，想有番啲幻想。」

「盈樂」在醫院外接受訪問，分享喜悅。

兩人上車離開時不忘向傳媒揮手道別。

直至聽到女兒第一下喊聲，「盈樂」感動得即場落淚，嘉樂說：「老婆喊到好似噴水池咁，我都係小噴水池。慶幸入咗產房，件事好微妙、神奇、好珍惜，好『amazing』、『incredible』同『wonderful』。」嘉樂坦言初時堅拒親手剪臍帶，擔心自己手勢不好令女兒肚臍唔靚，結果被醫生反問他是否怕血。他說：「我心諗我拍慣動作片點會怕！最初我以為一吓過剪，但原來好硬要剪幾吓。好開心，估唔到嘉樂仔可以做老竇。到依家好似發夢咁。」在旁的盈盈則踢爆說：「佢呀！仲即刻隊部相機畀我叫我幫佢影相呀！我幫佢影咗囉！」

嘉樂笑盈盈未收肚，懷疑仲有一個細佬喺入面。

嘉樂曾被指與「盛女」Bonnie非常似樣。（資料圖片）

唔想似「盛女」

盈盈透露生產過程痛了約兩小時，但嘉樂說：「佢當時有啲亂，問我會唔會生唔到。我引用拍電影《逆戰》時對謝霆鋒由八樓跳下嘅一句說話，同佢講『唔好諗做唔做到，要諗點樣去做到』。」問覺得女兒似父親還是母親？嘉樂笑說：「姑娘話似我，我即刻諗起Bonnie（《盛女愛作戰》參賽者之一），咁梗係似阿媽好啦！婆婆嫲嫲就話似佢。囡囡對眼好闊，一定眼大似阿媽。」他笑言曾考慮為女兒改名「錢晴」，但需由父親修飾。

二人表示喜歡小朋友，待盈盈休養後再計劃追多個。嘉樂說：「希望追個細佬啦！」完成訪問，二人先返回病房，未幾已見其助手從側門運送物品離開，「盈樂」隨即一同步出並登上保母車出院，並透露女兒已返回家中。為了照顧傳媒需要，兩人之後發全家福照片，相當周到。

另外，「盈樂」接受《東張西望》訪問，盈盈生女前曾一度無氣力，更問老公：「我會唔會生唔到？」嘉樂即鐵漢柔情安撫盈盈：「我叫佢唔好諗咁多，深呼吸，定啲嚟！」

文：影視組