Cara G.17姊妹陪玩 醉爆自摸

Cara G.將於本月30日下嫁同是模特兒的男友Jesper，婚期逼近，Cara前日就與全女班好友來個大解放，開船Ｐ舉行婚前最後單身派對，Cara表示：「嗰日上午，我同17個好姊妹先到酒店歎咗個豐富brunch，然後就上船狂歡。」由於船上沒有男生，身穿比堅尼的她們做出各種瘋狂甫士，包括自摸動作，相當性感惹火！難怪Cara笑言：「我哋玩到夜晚８點半，因為飲咗好多香檳，醉晒，連直線都行唔到，簡直筋疲力盡，返到屋企即刻瞓着，好盡興！」

男友放心冇詐型

Cara又表示，這17名好姊妹將擔任其婚禮的伴娘和姊妹，大家老友鬼鬼，當日還傾了很多心事，令她覺得非常難得。問她在船上玩得如此放任，Jesper會否詐型？她甜絲絲表示：「因為係全女班，佢好放心，仲叫我玩得開心啲。（係咪婚前最後一次玩得咁癲，婚後就唔會咁？）梗係唔會，任何時候都可以瘋狂，唔會因為結咗婚而唔同朋友玩。（婚禮之後會再搞瘋狂派對？）唔會，想個婚禮浪漫溫馨。」

Cara（右）high爆玩自摸。

Cara（左）與一眾姊妹玩到似倒地葫蘆。

親自製作結婚帖

提到在婚禮上，會否再穿比堅尼示人？Cara坦言不會，並已為自己設計了婚紗和晚裝，大走簡單復古路線，又笑言舉行婚禮的小島，平日很少人光顧，所以她的婚禮算是當地酒店的大生意。而最令人感動的是，Cara邀請的百多名賓客，全部都收到她親自製作的請帖，原來Cara親自把請帖放入玻璃樽內，然後逐一寄給賓客，相當有心思！

文：名人組