溫碧霞升呢阿媽 索贏「靚妹仔」
一向性感示人的影星溫碧霞（Irene），昨日與舊拍檔麥德和，以及何浩文（Dominic）和新人許雅婷（Kabby）為電影《微交少女》進行開鏡儀式。新片是經典電影《靚妹仔》的延續篇，這次由靚妹變身阿媽的Irene魅力不減，昨日露肩又露腿，贏盡現場一眾後生女！
溫碧霞、麥德和、Dominic和新人許雅婷、Super Girls成員李靜儀（Heidi）和蔚雨芯等昨日在荃灣一所中學為新片《微交少女》進行開鏡儀式，《微》片乃1982年賣座電影《靚妹仔》的延續篇。在《靚》片內飾演靚妹的Irene，今次飾演Kabby的媽咪，昨日露肩露腿現身，大騷事業線，索過晒現場所有後生女，真是講都冇人信《靚妹仔》已是31年前的事。
Irene和《靚》片的主角之一麥德和闊別多年再次聚首，不過這次二人由靚仔靚妹，變身阿爸阿媽，Irene坦言重遇對方非常感觸：「佢都冇乜點變，同以前一樣咁怕醜，性格一樣咁老實！」已轉行做生意的麥德和大讚拍檔愈來愈靚。Irene更大爆當年簽約拍電影時，因未成年要媽咪代簽，她說：「佢簽完喊咗好耐，因為驚我入咗行會學壞！」
Dominic願意行股惑
Dominic和Kabby在戲中會有床上戲，不過二人都不願透露激烈程度，Dominic更笑言：「有啲動作啦！（你尺度去到邊？）我可以露股！不過我驚嚇親佢（Kabby）！」外貌清純的Kabby，甚有初出道張栢芝的味道，問到飾演Irene女兒有否感壓力時，她就大賣口乖：「初初有，不過佢好nice，我到依家都唔敢叫佢媽咪，佢似家姐多啲！」
文：影視組