杜汶澤愈插愈旺封影帝
昨日《第十九屆香港電影評論學會大獎》舉行頒獎禮，英皇電影《逆戰》、《消失的子彈》勇奪「推薦電影」，三片共奪四個獎項。杜汶澤則憑英皇電影《DIVA華麗之後》勇奪「最佳男演員」，《逆戰》亦為林超賢帶來「最佳導演」殊榮。
杜汶澤在台上從羅蘭手上接過獎項，他感性地表示這是他在香港奪得的首個演員獎：「多謝英皇老闆楊受成對我嘅支持和信任。以前好想拎獎，學人拍啲文藝片，但拎唔到。年紀大咗凡事出心去做，反而拎男主角，真係無心插柳，希望以後都保持呢個方法繼續插落去！」
讚容祖兒林欣彤
阿澤又讚戲中女演員容祖兒和林欣彤演出同樣出色，可惜未能膺最佳女演員，他說：「尤其係林欣彤，佢演戲好有天分，曾志偉同佢合作過都咁講。祖兒屋企個櫃擺滿晒音樂獎，電影獎可能意義不大，但都要畀人睇到佢識做戲。」
對於今屆「最佳女演員」從缺，阿澤讚江若琳在《高舉．愛》中的演出令人動容：「人哋話佢係金像獎女主角冷門，我就覺得係大熱。」對於彭浩翔近期的電影成績理想，他笑說：「好多人話佢百厭，原來百厭係啱嘅。新導演唔使聽啲『老嘢』講，唔需要怕畀人話。」問到會否為彭浩翔因賈選凝言論而平反？阿澤說：「唔使平反，惡評唔係事實。（有傳亞視封殺你？）真令人擔心，一個零收視節目嘅電視台嚟講，我係零影響。如果有一點收視，對我就有一點影響！」
江若琳多謝鼓勵
而代表《高》片領獎的江若琳感激阿澤開腔力撐演技：「多謝支持，有機會參與已經係一個好大嘅鼓勵。」而電影評論學會會長陳志華坦言江若琳在《高》片的演出，在討論過程中評價過，可惜最後投票中因機制問題而從缺，會檢討是否要改善機制。「最佳導演」林超賢對得獎感興奮，笑言頒獎嘉賓羅蘭未拍過動作片，可以開拍一部《聖羅蘭機關槍》給她主演。
文：影視組