林雪避談孭數冇着草
任達華演而優則導，首次退居幕後擔任導演，邀請被指欠債走佬到大陸的男演員林雪客串，傳聞指杜琪峯為林雪還債達二百萬，林雪未有否認欠債，說已在內地密密搵食，年拍十幾部電影，並公開感激阿杜幫助：「導演咁多年來幫咗我好多！」
華哥初次執導鬼片題材電影，前晚便與劇組到中環一舊式粥麵檔拍攝，華哥一臉認真的投入工作，但星味始終沒法擋，惹來不少途人爭相要求合照，令拍攝進度一度受阻，但華哥依然保持一貫親民態度，有空時亦盡量滿足市民要求。
扮相恐怖有尿難屙
林雪在劇中飾演「為食鬼」，加上他的幾十吋大肚腩可謂度身訂造，現場所見，林雪髹到手、面白色，猶如「白無常」一樣，由於造型過分逼真恐怖，當林雪想到旁邊的公廁方便時，亦被劇組阻止，工作人員對他說：「忍一陣啦，你咁嘅裝扮怕你嚇親人呀！」
獻第一次要攞利是
早前曾有報道指林雪因欠債而着草走佬，要由導演杜琪峯仗義幫忙還二百萬數，問及久未在港露面的林雪時，他對欠債避而不談，只感謝導演阿杜的幫忙：「導演咁多年來幫咗我好多，有個咁好嘅導演都幾好。」他指近年長駐內地搵真銀，前後接了十幾部戲，坦言今次為華哥才回港客串兩日戲份，林雪說：「華哥都幫咗我好多，我咩都冇問就返嚟幫手，估唔到就奉獻咗我第一次——扮鬼，拍完一定要問佢拎番封利是先。」
文：影視組