盈盈百無禁忌 汽水送辣蟹

嘉樂與盈盈婚後極為恩愛，加上盈盈身懷六甲，男方連月來已減少工作照顧太太。腹大便便的盈盈更是胃口大增，身形明顯豐腴不少。早前她透露由於體重比正常孕婦超重，在醫生建議下，為了腹中B女的健康着想，已戒掉最愛吃的甜品。

錢嘉樂拖實過馬路

雖然盈盈已乖乖忍口，謝絕不少美食，但日前她與老公晚膳時又破戒。當日晚上八時許，預產期為本月十七日的盈盈挺着大肚子，與老公現身銅鑼灣，二人除戴上情侶眼鏡外，更襯到絕以全黑打扮上陣。穿上平底波鞋的盈盈，見其上圍升級兼肚大如籮，身旁的嘉樂則時刻與她十指緊扣。二人於該處商場外邊傾邊講，似在等人，未幾便見盈盈父母前來會合。嘉樂甫見外父外母到場後，即示意他們過馬路，健步如飛的盈盈更一馬當先，老公見狀即緊張地拖着她慢慢行。

細心的錢嘉樂經常起身為老婆送上食物。

過馬路時，錢嘉樂即拖實老婆，認真體貼。

眾人其後步行到灣仔著名的辣蟹食肆，只見四人甫坐下已點了滿枱美食，當中不乏招牌辣蟹及海鮮。當食物到來時，大肚婆盈盈似乎極為肚餓，見她急不及待拿起筷子吃個不停，在旁的嘉樂亦體貼地不時為她遞上食物及飲品。不過狂食谷肥B的盈盈全無禁忌，見她大啖大啖吃，又頻頻狂飲冰凍汽水，吃得極為滋味的她擦了足足半個多小時才停口，一行人最終逗留約個多小時才埋單離開。

可能戒口太耐，盈盈飲汽水時相當滋味。	湯盈盈大啖大啖食，大肚婆果然好胃口。	兩人在街頭左望右望，似在等人。
盈盈父母到後，眾人即由銅鑼灣行去灣仔開餐。

對於太太沒有戒口，愛妻心切的錢嘉樂昨日接受電話訪問時攬上身：「佢冇食辣蟹，只係食小菜，汽水係我飲嘅，都係畀佢飲一、兩啖過口癮啫！咁多老人家在場，大把人睇住佢啦，依家酒都唔畀佢飲o架。」提到太太即將臨盆，他說：「心情好緊張，依家只敢接剪片工作，可以隨時陪佢生。我已經模擬入院過程同路線，到時唔會出錯。」

產後停工環遊世界

另外，盈盈昨晚到將軍澳電視城出席慶功宴，穿着厚底波鞋的她笑說：「預產期係三月十七日，BB已經改咗英文名Alyssa，中文名要等老爺改。（準備好BB用品？）冇買呀，只係買咗啲胸圍，BB嘢朋友好多，羅敏莊都叫我唔使買，已經有一袋BB衫。（升咗cup？）好開心呀，好勁，但唔知係咩cup。（驚收唔到身？）都驚o架，依家重咗六十磅，肥咗喺大髀、屁股，仲有妊娠紋，手指仲腫到結婚戒指都戴唔到。」

臨盆在即的她透露嘉樂停工陪產，但昨日老公沒與她一齊到場，因她仍可以自己駕車。問到產後會否減少工作？她說：「頭一年都會o架！要去環遊世界。（帶埋BB去？）老公唔畀呀！（趁機再造人？）去嗰啲地方唔啱！會去非洲啲草原。」

文、攝：追蹤組