黃翠如受壓 努力洗底
藝員黃翠如與張振朗在新劇同樣是新丁上場，翠如緊張處女劇出街反應，希望能憑努力洗去有高層撐腰的傳聞，翠如說：「大家唔識黃翠如先會有呢個title，希望可以洗去呢個title。」被封「少年黃宗澤」的張振朗則覺得會容易被觀眾記得。
黃翠如的處女劇《心路GPS》最近出街，新丁翠如自然有壓力，壓力來自未知觀眾是否接受她由主持轉型演員，她說：「演員呢個title對於我嚟講係好遠好高，自己好恨有演員呢個title，覺得做演員好有福氣，希望劇集出街後觀眾會鍾意，自己目標想做一個識做戲嘅演員，咁先可以繼續演戲。」講到農曆新年劇集收視一向麻麻，她說：「自己對收視冇概念，收視方面交畀司棋姐、展鵬啦。」
做女要爭氣
翠如在加入無綫不久即有劇拍，機會來得比別人快，惹來有高層撐腰傳聞，她說：「我覺得係因為大家唔識黃翠如，所以先加咗個title畀我，希望可以憑自己嘅努力洗咗呢個title。」
翠如戲中有個「潮州怒漢」爸爸，父女意見不合經常開火，她指現實中爸爸也是潮州人，所以演繹角色也容易投入和掌握，翠如說：「我爸爸都係潮州人，想追仔所以生咗我哋五姊妹，唔同嘅係佢好錫我哋五姊妹，但係由細到大會覺得女仔係畀男仔低一級，所以我哋五姊妹都有共同嘅諗法要爭氣，要努力讀書，要有成績畀外人睇。」
貌似黃宗澤
訓練班出身的「少年黃宗澤」張振朗與翠如同演是拍劇新丁，他說：「好好彩今次係做司棋姐個仔，自己經驗唔多，往往係司棋姐帶我入戲，佢又提點我要注意講嘢嘅語氣。」被指貌似黃宗澤，張振朗也覺得人有相似，好處是容易被觀眾記得。
文：影視組