田啟文怕丟架 積極練戲
田啟文在娛樂圈打滾多年，經驗豐富。稍後他將首次演出舞台劇，與舞台劇演員焦媛、黃嘉威等人合作。田雞坦言與一班專業舞台劇演員合作感到一定壓力，現每朝跑步練氣減肥裝備自己，希望不會丟架！
舞台劇演員焦媛、黃嘉威與資深電影人田啟文（田雞），首度攜手合作舞台劇《Mr.o靚模》。首次演出舞台劇的田雞，謙虛表示事前要做足準備，以免拖垮整體演出。首當其衝是需要積極瘦身減肥和練氣，他說：「我每朝8點要起身去跑步，練完氣之後就排戲。佢哋個個都咁專業，我唔可以失禮人哋，要做足準備。」他表示位位演員均十分專業，與他們合作有一定壓力：「雖然我年紀最大，但係最新嗰個，希望唔好丟人架。佢哋個個高手，見到佢哋演出真係五體投地。」劇中田雞需要又唱又跳，他坦言：「跳舞根本係我嘅弱點，我仲要唱快歌，真係要慢慢排好佢。」
黃嘉威分飾多角
問到為何找田雞合作，焦媛表示讀演藝學院時，有個暑假去CAST做臨時演員，因而認識對方，她說：「佢對我哋啲學生好好，有時收夜班都會車埋我哋，我對佢印象好深刻。所以今次有啱角色好想同佢合作。」問到會否教佢舞台上的演出，她說：「唔使，佢好犀利，發揮得好好，佢好專業。」黃嘉威在劇中一人飾演多角，當中包括導演、市民、藝人穿插劇中，他說：「都幾好玩。田雞做事認真、有幽默感、反應好快，但認真時又好似搞緊笑。」
文：影視組