李嘉欣傳婚變：不嬲唔黐佢
大美人李嘉欣與夫婿許晉亨近日傳出感情亮起紅燈，前晚許晉亨入馬場拉頭馬，未見嘉欣陪同，昨日嘉欣獨自出席活動時，解釋自己向來不愛黐老公，知道誤會是源自微博，但她表示一於少理。
昨日李嘉欣出席一部環保紀錄片電影的座談會，與戲中的主角嘉旺竹巴法王傾談分享，她說雖然兒子許建彤（Jayden Max）只有兩歲，但認為注重環保應從小教導，她曾陪兒子看該部電影，爆兒子大叫「Holiness」戲中法王的尊稱，但不清楚兒子是否明白內容。
秘密外遊慶牛一
提到丈夫許晉亨上月25日生日如何慶祝時，嘉欣竟說：「唔記得。」她再解釋：「唔係唔記得佢生日，佢正日同一家人慶祝，之前我哋去咗第二度慶祝，去咗三日，冇帶個仔去，唔敢去得太耐，但去邊就係秘密，（老公拉頭馬點解唔出現？）夜晚十點已經瞓咗，Jayden咳得好厲害，我都少少咳，（擔心多病毒？）個個都擔心，嗰日帶Jayden去睇醫生，知有好多呼吸系統病，（之前傳你哋感情亮紅燈？）我不嬲唔係成日黐住佢啦，我知道件事源自微博引發大家想像，但唔會唔寫微博，唔理人哋啲想像。（個仔係咪你哋嘅電燈膽？）先生先至係我同個仔嘅電燈膽。嗰日去完旅行，個仔見我哋就跑過嚟，老公跑喺我前面，我哋互相鬆肘，希望個仔第一眼見嘅係我！」
JC飲大咗跳醉舞
前晚跑馬地馬場除有許晉亨外，還有穿tube dress的混血名模Jessica C.（JC）出席，JC表示喜愛飲酒，與男友飲酒時，男友會叫她放膽飲，原因有他做保鏢。JC又自爆飲醉會不停說話、跳舞及不停吃東西。
文：名人組