楊怡派定心丸 讚謙謙筍盤
近期被熱炒的筍盤馬國明再度與楊怡在新劇合作，但緋聞似乎也難傳到兩人身上，皆因楊怡有男友羅仲謙同劇「監場」，楊怡又大派定心丸自命夠定力，又讚羅仲謙也是筍盤，謙謙應該放心晒。
藝員吳啟華、馬國明、羅仲謙、楊怡、朱千雪主演的劇集《On call 36小時II》昨日在將軍澳電視城進行開鏡拜神儀式。楊怡與近期熱炒「筍盤」馬國明再續上集前緣，第二集已結婚成為夫妻。
馬國明近期雖然受追捧，緋聞多籮籮，但相信也難傳到楊怡，皆因楊怡有男友羅仲謙同劇演出。問到楊怡有羅仲謙同劇，似乎緋聞也傳不到馬國明﹖她說：「吓﹖邊個呀﹖咁我咪少咗機會宣傳，馬明係筍盤唔出奇嘅，直情係鑽石王老五。」（羅仲謙定馬國明筍啲？）邊個筍啲都冇所謂，兩個都咁靚仔，佢哋都好多共通點。（羅仲謙驚唔驚你哋傳緋聞﹖）唔知，你要問佢。（你定力夠唔﹖）我喺呢行咁耐，定力好夠。（羅仲謙劇中多唔多女伴﹖）咁又冇睇過佢條線點發展喎。」
朱千雪否認叻哥撐腰
吳啟華在劇中與朱千雪一對，但暫時未有咀戲，他大讚朱千雪的表現：「表現好好，好過自己做新人嗰陣，佢唔會緊張，比預期中好好多。」啟華八年後再拍無綫劇，自言感覺良好，暫時每日拍一兩場戲，相當舒服，相信會每年拍一部劇集。
有指港姐亞軍黃心穎鬧爆朱千雪，不滿她只是季軍，工作卻多多，還指朱千雪有後台陳百祥撐腰。朱千雪否認：「呢個報道好好笑，反而係黃心穎話畀我知嘅，我哋冇唔啱，叻哥都係選港姐時認識嘅，佢拍嘢一向好錫大家，個個對我都好好。」
文：影視組