吳雨霏晒情侶篋 留心傳情
余文樂與「女友」吳雨霏（Kary）前晚結束10日歐洲之旅玩到腳軟返港，兩人以情侶裝兼情侶篋出現，用行動印證「樂霏戀」，升呢「樂嫂」的Kary前晚急不及待將與阿樂的「情侶篋」相片放上網高調晒恩愛，更留下心心公仔，認真sweet爆。
阿樂與Kary的「樂霏戀」成為近日網上熱話，縱使女方被網友插到體無完膚，但無損她與「男友」阿樂歐遊心情，前晚雙雙從英國返港異口同聲「叫攰」，阿樂全程四萬咁口面對傳媒，升呢「樂嫂」的Kary則春風滿面低頭「冧笑」，雖然兩人未有親口承認拍拖，但齊齊推住情侶篋出閘，以行動宣布情侶關係。
4千網民「Like」
Kary返回家中即高調晒恩愛，拍下與阿樂的「情侶篋」上載到instagram，並留下粉紅色心心，吸引近4千網民「Like」，而阿樂昨日即投入工作拍廣告，並分別上載一張工作及穿上運動褲、波鞋相到instagram，由於阿樂寫下：「成個月冇郁。」有抵死的網友留言說：「床上面郁都算嘅。」
向老闆交代戀情
據知，兩人返港前得悉有傳媒接機，已夾定口供回應，由於Kary所屬的環球唱片怕感情影響事業，故希望Kary將感情事低調處理，所以Kary早年與舊愛網球王子復合時即轉玩地下情，Kary更會日內返公司與老闆黃劍濤交代「樂霏戀」。
另外，Kary前緋聞男友周柏豪日前與緋聞女友連詩雅拍攝廣告，兩人毫不避忌表現親密。
文：音樂組