峯語蜜遊米蘭擔保冇造人

林峯與吳千語繼「東京攻略」、「戀戰沖繩」後，昨早又完成「情迷Milano」之旅，由米蘭拍拖秘密返港，更刻意前後腳分開行、一身黑衣、推着三大箱行李的林峯先行出閘，問從哪裏返港？有異性冇耐性的他說：「我依家放緊假，呢啲唔使交代。（唔見你女友？）唔使畀個schedule你啩？（一個月去三次旅行？）早晨！（女友前後腳出嚟？）呢啲唔使交代。（女友要開工先提早返港？）多謝！」

雙手插袋冇推行李

約十分鐘後，峯嫂千語BB春風滿面出現，由一名男性友人接機，雙手插袋的她未見隨身行李，估計愛郎已代為處理。似與峯峯似夾了口供的她，被問為何前後腳、是否趕出活動才返港等問題時，她只以一句「多謝」回應。再問是否為了拍拖而推了很多工作、公司有否抱怨？她才為自己辯護：「我之前喺內地拍劇三個月。（點解雙手插袋？）我放緊假，唔想講私人嘢。」但千語BB伸手開車門上的士時，才「不慎」令左手食指疑似婚戒曝光。

一臉風騷的千語雙手插袋，似不欲手中戒指曝光。

當千語上的士時，終百密一疏露出戒指（圓圈示）。

千語與鄭中基、薛凱琪、熊黛林等昨晚現身電影《百星酒店》慶功宴，她甜笑回應與峯峯外遊：「今次去米蘭同佛羅倫斯，去咗幾日，主要睇建築，林峯以前讀過。」之前二人從日本返港，千語口窒窒否認同房，事後被外界寸太假，故今次再被問有否同房時，她選擇不正面回應：「太私人，唔回應。（秘婚？）唔會，開心事會同大家講。（戴婚戒？）我自己買，冇送過畀我，到另一階段先會收。（打算嗰邊結婚？）未諗到咁長遠。（驚唔驚懷孕？）絕對唔會，一步步嚟，會結婚先，結婚係人生大事，對女仔好重要，要有圓滿計劃。」

叫愛郎真名「阿文」

之後千語BB竟爆峯峯遲到缺點未改：「平時都有呢個問題，要我催佢。（點解佢要你搭的士？）我提出，想低調，知有記者。（佢大男人？）冇！（佢浪漫？）平時佢做嘅，我全部估到。（你哋點叫對方？叫honey？）冇咁叫佢，我叫佢原名阿文（林峯原名林滙文）。」

林峯經理人昨日透過電話回應：「林峯今日（2月28日）放完假，3月3日出席簽唱會。（峯語秘遊米蘭？）只知佢放假。（千語戴戒指，傳同林峯秘婚。）冇聽過，私人嘢你問番佢。」據知「峯語」一個月內外遊三次，估計豪使合共接近50萬港元。

文：影視組