馬國明 岑麗香BBQ火速升溫
無綫藝人馬國明堪稱圈中筍盤，自與胡定欣甩拖後，先後與朱晨麗、唐詩詠等傳出緋聞。馬國明昨日自爆農曆新年期間與「女神」岑麗香BBQ，又讚對方好女仔，看來「香香女神」被寵幸了。
馬國明與陳法拉昨日以大會評判身份出席「2013國際中華小姐競選」活動，馬國明自爆農曆新年曾與「女神」岑麗香BBQ，令人二人關係升溫。問覺得香香為人如何？他直說：「你問我邊個女仔，我都係答好好o架啦！大家對我感情生活比我阿媽更關心。我哋係去導演屋企燒嘢食，同事聚會啫，都冇車佢出入。」
香香昨日則透過電話表示當日不是情人節，問覺得馬國明為人如何？她說：「哈哈哈，佢份人幾Nice幾好人。（有機會發展？）冇諗呢啲，聽好多女仔講佢係筍盤，但我外國返嚟唔清楚啲人背景。唔係啩？到我嘞（指緋聞）？講真都冇乜嘢，入行都預咗傳緋聞。」
讚詩詠性格好
馬國明自爆與香香BBQ之際，另一邊廂又傳出與唐詩詠拍拖三個月，並被拍得共餐，他對此解釋：「搞笑！成班人去林子善度食飯啫。不過詩詠為人、性格都幾好。（發展？）唔知佢嗰邊點（指唐詩詠與崔建邦）。」問到若對方單身會否展開追求？他認真想了一會後才說：「唔知呢，朋友同女友要求唔同。」唐詩詠則透過電話直認「個個都有機會」：「馬國明好好人，同佢拍多幾套劇先啦，隨緣。（係你杯茶？）要相處吓先，依家大家關係幾好。」
曾與馬國明傳緋聞的朱晨麗，被問怎看馬國明與岑麗香這一對？她在電話中說：「呢啲問番佢哋。（呷醋？）點會，工作都冇時間。同佢一段時間冇見，但過年都有傳訊息恭賀。佢為人孝順又好人，筍盤嘛！（發展？）隨緣。」
文：影視組