秋生葉問上身 志偉變木樁
黃秋生與曾志偉寶刀未老，拍新片對打重頭戲份絕不欺場。秋生笑言志偉返家要捽跌打酒療傷，志偉則打趣指秋生當自己是木樁狂揪，二人拳來腳往之餘不失幽默，果然薑愈老愈辣。
秋生與志偉於英皇新片《葉問—終極一戰》內同樣扮演武林高手，「葉問」秋生與身為白鶴派掌門人的志偉月前拍攝了一場「世紀決戰」，雙方識英雄重英雄。拍攝前為緩和氣氛，二人竟將武打招式以慢動作預演，令台前幕後忍俊不禁。武術指導花了2小時設計相關招式，二人拳、腳、跳、轉反覆練習3小時，務求一take過完成拍攝工作。
雙手盡瘀
秋生與志偉雖然「一把年紀」，但一個練功多年、一個武師出身，身手仍然相當靈活，順利完成當天戲份時，更令全場拍案叫絕。秋生事後坦言：「綵排戴咗手套，正式roll機就赤手空拳。志偉都60歲啦，但好好打，拍完後發現雙手盡是瘀傷，不過我諗佢返屋企都會捽跌打酒﹗」志偉亦「回敬」秋生謂：「佢為咗部戲走去練詠春練咗差唔多一年，佢直頭當正我好似木樁咁，打得非常有力，我梗係出全力還擊啦，佢啲拳風仲喺我耳邊擦過添，能夠遇到真正高手係一件非常難得嘅事。」
經過6小時戲裏戲外對打，二人大叫打得過癮，又安坐茗茶聊天。今次將一代武術大師的生平點滴重現大銀幕上，秋生與志偉不約而同認為武德最重要，高尚的自我修為才是習武的精髓所在。
文：影視組