甄妮巨肺晒料 借「軒」寸G.E.M.
樂壇「巨肺」甄妮的《愛SHOW世界巡迴演唱會「完美篇」》前晚在紅館順利完成首場演出，已屆花甲之年的甄妮仍然大晒美好身段，以性感歌衫大騷半球，又句句有骨的暗寸早前和她隔空罵戰的G.E.M.，認真好火。
殿堂級歌手甄妮前晚在紅館演出一連三場的演唱會，全場爆滿，呂良偉、林建名、陶敏明、無綫高層梁乃鵬等撐場，而女兒Melody則任演唱會導演，全晚留守控制台注視媽媽的演出。年屆60的甄妮所選的服裝都是性感、low cut、超迷你裙及deep V裙，又唱又跳不遜後輩。
多是非話準
肖蛇的甄妮在台上說今年是她的本命年，早前特地去問流年運程，相士指她會是非多，她說：「幾準呀，大家都睇到啦。」擺明暗寸早前與她鬧是非的G.E.M.（鄧紫棋），又指會有血光之災，故去剝牙應劫，笑言要多收利是沖喜，並將利是錢捐出做善事。
任嘉賓的張敬軒出場時被甄妮大讚乖仔兼有禮貌，兩人又大講有味笑話，甄妮先問軒仔：「你知唔知我有巨肺稱號？」軒仔說：「聽講係黃霑所改，同你上半身有關。」甄妮解釋說：「原本黃霑想叫我『巨胸』，但後來想文雅一點，才叫我『巨肺』。」又說沒有人用肺唱歌，唱歌是用丹田、喉嚨及用心去唱，更奇怪有人會分大、中、細肺！明顯再發功暗寸「小巨肺」G.E.M.。而軒仔除了陪笑亦賣口乖讚甄妮的皮膚白滑，她即說：「我第二度仲滑呀！」引來台下一陣笑聲。
唱歌唔使嗌
甄妮更對時下的唱歌比賽有意見：「我唔係批評人，唱歌係好舒服好輕鬆嘅事，唔明白點解一定要將首歌升高個key，唱到爆晒錶咁，人哋都聽得唔舒服啦，唱歌唔一定要嗌，咁樣都攞到冠軍我真係覺得好奇怪。」她又說歌手開騷的基本條件：「起碼要有十張唱片、二十首hit歌，唱人哋嘅歌就冇意義！」自言積累了百多張唱片，無數經典金曲才在紅館開騷。提到女兒Melody任演唱會導演，她指女兒的Rundown安排辛苦：「好似想攞我命咁。」雖然不喜歡，但都順應要求盡力去做。
文：音樂組