Bobby：日日吸氧氣
藝人歐陽震華（Bobby）日前因急性肺炎入院，已脫離危險期的他，昨日首次透過電話交代病情，說話仍氣若游絲的Bobby表示目前肺部仍有陰影，故未能出院：「我依家每日都要吸氧氣，為咗快啲好，醫生每日都安排物理治療師幫我拍痰，但係我曾經試過肺積水，所以依家抖氣嗰陣仲會覺得氣喘，不過醫生話係正常。」他又表示當晚自己在醫院急救了十多小時，情況十分危險：「能夠執番條命都算好彩，最令我過意唔去就係嚇親老婆同令大家擔心，所以希望能盡快病好出院復工。」
而Bobby的好友關詠荷昨午12時45分帶着《情逆三世緣》劇組自製的「Get Well Soon」字樣慰問卡到醫院探望Bobby，逗留約半小時後回電視城繼續拍攝《情逆》。她對於Bobby能大步檻過表示恭喜，又指Bobby好精靈，只係之前因為插喉太辛苦關係，而顯得較前消瘦及有鬚根。
