高Ling玩自閉香香搵女吹水
高海寧（高Ling）與岑麗香（香香）貴為宅男女神，理應裙臣眾多，但二女竟異口同聲表示情人節冇約。高Ling選擇留在屋企，並怨家中桃花未曾開放，姻緣未至，香香則與一班女性朋友食飯傾偈，熱鬧過節。
2月14日乃西方情人節，不少男士都趁這個大日子向心儀對象表心迹，不過高Ling和香香兩位女神，前晚及昨日分別出席活動時，卻齊聲表示沒有男仔邀約。
作揖恭喜順勢護胸
高Ling前晚與麥長青為賀歲片《2013我愛HK恭囍發財》謝票，走遍尖沙咀戲院及旺角鬧市向觀眾派發電影小禮物，由於旺角人流眾多，故邵氏亦派出數名保安，並以黃色繩把二人包圍，期間高Ling不時以手作恭喜發財狀護胸。
談到情人節，高Ling表示冇街去，並笑謂：「屋企有棵桃花好多『冧』，不過仲未開花，所以對今年愛情運唔抱太大期望。」她又自爆入行後都冇拍拖，dry足多年，又因自己不善say no，為免令人誤會，所以情人節不敢外出，留守在家。問到是否要求過高，高Ling坦言只是外間誤會，實質想找一位寵愛她又人品好的男生，更揚言若果遇上理想對象，絕不介意閃婚。
擔心師妹影響鬥志
至於前華姐冠軍岑麗香昨日則身穿黃色低胸連身裙出席活動，提到新一批候選華姐登場，身為師姐的她自言尚未細心留意，但直言會偏心溫哥華及香港代表。對於有佳麗被爆夜蒲照，香香反而較擔心會影響其參選心情。香香透露今年農曆新年比往年開心，因朋友增多亦逗了更多利是，但沒有行花市故此買不到桃花，問到會否怕冇桃花運？她說：「鬼妹仔唔識呢啲嘢嘅，我做好事業先，希望明年會有支桃花！（情人節點過？）同全部女仔朋友食飯傾偈。（冇人約？）冇呀！但唔Lonely。」
文：影視組