亞男5000蚊投車牌HANDELA氹愛人
華姐出身的李亞男昨日透露花費5千蚊投得「handela」車牌送給男友王祖藍作情人節禮物；而祖藍昨日大派雙封利是，惹來秘婚疑雲，兩人即異口同聲否認。
李亞男昨日為婚紗騷擔任模特兒，透露男友王祖藍情人節正身在飛機上故沒有慶祝，難怪祖藍回港後即急急約女友見面兼食飯補數。李亞男說：「尋晚同成班《老表，你好嘢！》啲朋友一齊食飯，祖藍都喺度，（你有份拍續集？）度緊，希望可以演出搞笑角色。」
望收親手造禮物
李亞男坦言仍未收到男友送她的情人節禮物，而她就成功投得了「handela」車牌給祖藍作情人節禮物，因男友曾反串扮演Handelababy而大受歡迎，她續說：「搵朋友幫我Bid嘅，Bid咗$5000，無人舉手。（祖藍知未？）佢未知。」問到她想收到甚麼禮物，她說：「我想收到有啲係親手造嘅嘢，會幾開心。佢之前簽咗隻碟畀我，我幾受o架。」提到祖藍昨日派雙封利是，她笑說：「咁奇怪嘅？我派一封喎，要問番佢先。（係咪已經秘婚？）無咁早呀，做好工作先。」
祖藍昨日出席另一活動時派雙封利是，但就否認已秘婚：「我怕佢（李亞男）見唔到大家，幫佢派埋！」被問到曾想送粒星給李亞男的事，他說：「好耐嘅事，應該係第一年嘅情人節，我check過只係畀張紙你寫住你命名個名，太空總署唔會有紀錄。」有指電視劇《老表，你好嘢！》添食，問到可會推薦女友拍劇？祖藍說：「依家已經好多是非，但如果大家OK，唔排除呢個安排，都要睇番有無適合嘅角色。」他透露新劇會講述社會矛盾，又承認這套劇帶挈了很多人。
文：名人組