無綫口號振聲威 王維基有信心攞牌

因為老闆陳國強外遊關係，無綫團拜昨日由行政主席梁乃鵬博士、集團總經理李寶安、電視廣播業務總經理鄭善強等帶領過千員工團拜，而員工利是由去年$2升至$10，梁乃鵬更代公司派$50開工利是給傳媒，及後便上台致詞，並語帶雙關謂︰「公司去年劇集成績好，咁好成績有好多人妒忌，但係無綫我哋願意接受挑戰。」之後便與全體人員叫口號。

等屋宇署批圖則

至於香港電視與無綫一直就發牌事件有爭拗，不過昨日兩台不約而同率領員工舉行新春團拜，前者雖然尚未獲得牌照，但昨日老闆王維基與行政總裁杜惠冰，與逾百名台前幕後人員如張可頤、石修、陳齋平、陳綺雯等團拜，期間王維基更大派百元利是，再加上杜惠冰及開工利是，HKTV每位員工獲$300利是。

梁乃鵬由應屆港姐亞軍黃心穎陪同下點睛。	「一姐」張可頤因拍劇姍姍來遲，對公司派$300利是表示滿意。	王維基（箭嘴示）與HKTV逾百名台前幕後人員團拜，場面熱鬧。

王維基透露新年願望是希望政府快點發牌，他謂︰「依家我哋要做就係積極拍多啲節目，同埋都有信心會發牌，將軍澳廠房打晒樁，等緊屋宇署批圖則，呢度相信係繼無綫後，香港第二大電視台，（公司簽咗亞視被炒藝人？）任何人對呢行有熱誠都歡迎佢哋加入。」

寸亞視唔夠正經

而「一姐」張可頤因拍劇姍姍來遲，對於公司派$300利是，她笑謂︰「我收過六叔封利是，20大元，其實幾多錢唔緊要，利是係意頭。」去年底被亞視炒魷魚的藝員陳綺雯，透露於上月尾與HKTV簽了兩年合約，更指新公司待遇比亞視好，問到是否感謝亞視炒她？陳綺雯謂︰「咁呢度係多咗機會，同埋呢度都正經啲，（亞視唔正經？）有時奇怪，好似去集會咁。」

文︰影視組