Bobby難忍肚餓偷食醬多
因急性肺炎入院的歐陽震華（Bobby）已搬離ICU，轉到急性綜合內科特別病房，昨日前往探病的蘇永康指Bobby精靈，更已吃到狼吞虎嚥，他又爆有「潔癖」的Bobby一開口就問他有否帶爽身粉。
Bobby早前因急性肺炎送院並於深切治療部（ICU）留醫，其經理人Lydia指他覺得ICU病房舒服不想搬，不過，昨日記者到醫院時，發覺Bobby已由ICU調往九樓的急性綜合內科特別病房，房間門口加有屏風，更有保安在場守候。
見美食扁晒嘴
昨午三時許，Bobby嫂傅潔嫻與Lydia出現，Lydia說及Bobby情況時說：「尋晚醫院打畀我哋，話深夜ICU要床位，所以佢轉咗去九樓。」Bobby嫂又指他問題不大，情況不俗，他怕不怕悶？她說不怕：「有電視睇，我都有買雜誌畀佢解悶。（食得嘢未？）今日家燕姐（薛家燕）送咗個果籃嚟，佢食咗啲生果，我都有煲湯畀佢飲。」說到之前有指Bobby心口痛，她坦言現時才知道。Lydia則說不會讓Bobby擔心工作上的問題，只想他快些健康出院：「佢個肺有事，影響埋個心，依家個心弱啲。佢好肚餓，睇電視見到啲飲食廣告，都擰轉面扁晒嘴。」據知，為食Bobby還偷食了花生醬多士！
「有冇爽身粉」
無綫監製莊偉健及高層梁家樹亦有前來探望，梁家樹笑言不是來給他壓力，劇集會跳拍其他部分，一切待Bobby康復才算。至下午五時，蘇永康出現，笑言代表BIG FOUR其他三位兄弟前來探Bobby，受訪時他指Bobby很精靈，又大爆他忍不到肚餓：「佢一見到餐車送餐，即狼吞虎嚥！Bobby冇剃鬚，佢同我都有潔癖，佢一開口就問我有冇帶爽身粉嚟。」因Bobby的手部仍有插喉，未能沖涼，預計兩、三日後可出院。蘇永康說到前晚演唱會慶功後，張衞健醉得像跳米高積遜舞步般，梁漢文行路如比薩斜塔，只有他最清醒。
文：影視組