認同霆鋒炒商廈祖名：得閒睇吓

最新一期《好報》獨家踢爆，年紀輕輕的謝霆鋒事業有成，製作公司賺大錢加上投資有道，坐擁8億豐厚身家。近年積極於中環擺花街掃地舖的他，自從政府去年推出加強版額外印花稅後，有意將資金轉炒商用物業，短線可以做炒家賺快錢，長線持有則可以讓自己旗下的製作公司「PO朝霆」免捱貴租。日前霆鋒孖住好兄弟「龍之子」房祖名到中環出巡，計劃合作斥資億元掃商廈。

昨日記者致電祖名，他直言：「嗰日得閒睇吓舖啫，都有傾吓生意經，不過都好初步。」

星爺日前到商場睇舖，大忙人的他邊行邊講電話。	心情勁靚的霆鋒離開時向記者揮手道別。	今期《好報》猛料如雲，全程追訪霆鋒在中環睇商廈。

心情勁靚手指指

當晚6時半，霆鋒與祖名於中環飲完紅酒步出，兩人沿着皇后大道中一帶慢行，當行到心水大廈即停步手指指，愈講愈興奮。記者上前拍照，霆鋒即笑說：「傾嘢啫，大事囉（伸手指向前面幾幢商廈）！都係呢幾棟囉！」問是否有意收購？他謂：「係呀！（係咪收購埋彤叔（鄭裕彤）棟新世界？）唔敢、唔敢。」

兩人和記者傾完隨即登車去附近食晚飯，醫肚後兩人意猶未盡，繼續邊行邊吹水。

星爺抽空睇舖

除霆鋒瞄準商廈有利可圖，圈中另一炒樓王周星馳日前亦趁百忙抽空到中環睇舖。星爺在一男一女友人陪同下步入商場，駐足數百呎店舖外，手持滿布數據的紙張指指點點。當發現記者，他即摺疊紙張，繼而極速和女友人登上的士離開。

文、攝：追蹤組