Bobby遭減戲 荷姐勸做體檢

預計留院一星期

Bobby太太傅潔嫻一早到醫院探病，中午離開病房時打出ok手勢，示意Bobby無事，至傍晚探病後，她透露Bobby不會轉病房，因Bobby出嗲功求醫生留他在ICU。有份探病的Bobby經理人Lydia引述Bobby說話：「佢清醒後話ICU好靜，好舒服，唔想搬喎。」據知，院方因為普通病房缺床位，才讓Bobby繼續住ICU。Lydia又指Bobby精神好好，但未落得床，未食得嘢，吊緊鹽水，醫生指要留醫一個星期。

昨日是情人節，傅潔嫻被問到Bobby知唔知今日係情人節？「佢一向都唔係浪漫嘅人，同我講唔好意思，情人節要我咁辛苦，其實老公健健康康出番嚟就係情人節最好嘅禮物。」

Bobby老婆（右）和Lydia一同探望Bobby。

朱晨麗及敖嘉年均希望Bobby早日復原。

Bobby急病打亂其孭飛劇集《情逆三世緣》拍攝進度，監製莊偉健昨日表示現在由替身拍攝Bobby的戲份，其戲份亦要刪減，但只能多拍幾日，劇集就要停廠，待3月出發到佛山拍攝外景，有信心Bobby可及時康復。受影響的劇集，還有緊接《情逆》拍攝的《On Call 36小時II》，莊偉健指未知要延期多久，一切視乎Bobby的健康情況，他笑說：「Bobby好番會叫佢唔好飲咁多酒，會叫關詠荷監控住佢。」

關詠荷則擔心Bobby心臟和血管有問題，見過他心口痛面青標汗，她說：「等佢出院會叫佢做身體檢查。（Bobby阻礙了煞科？）ok，我係家庭主婦，最緊要人冇事。」

拍檔祝早日康復

在新劇中飾演Bobby父母的敖嘉年與朱晨麗昨開工，二人均希望Bobby早日康復，至於停廠對他們的影響？朱晨麗表示：「我ok，等公司安排，仲可以趁機會接商場騷賺外快。」敖嘉年則表示無影響，因他的期已預到三月尾、四月頭。

文：影視組 攝：攝影組