陳法拉水着賀年 大利是唔逗

無綫今年識做地大派利是、花紅給各員工及藝人,昨日不少藝人都收到大利是,士氣大增,汪明荃興奮得於微博大叫「發達咯」,伍詠薇更賣口乖指會繼續留在TVB搏殺。至於陳法拉在外地以「比堅尼」賀歲,竟不知公司派利是。

無綫今年除了發花紅、開工利是$50及老闆陳國強的$100大利是外,為慶祝無綫45周年,更會向旗下員工及藝人發放$450的現金禮券大利是,一班藝人坦言愈來愈有士氣,亦覺公司有人情味。而汪明荃(阿姐)更「帶頭」報喜,於微博貼上利是相的阿姐謂:「各位TVB同事快啲去8樓藝員科取新年大利是,發達咯!祝大家情人節快樂。」

昨日於電視廣播城開工的藝人都大感興奮,當中視帝黎耀祥指公司與員工最緊要互相關心,之前笑指希望電視城開腳底按摩的他更笑言:「自己拍多兩部劇集,希望可以包起嚟做,做老闆肯定賺好多。」而馬賽坦言昨日已取利是,第一年攞利是的她分外興奮:「其實係好意頭,公司都開咗個通宵嘅小食部,感覺愈來愈有人情味。」

伍詠薇繼續效忠

而伍詠薇坦言增加了不少歸屬感,她大想頭的謂:「希望公司賺多啲,下年開始派二萬蚊畀員工,呢個係動力嚟,士氣都好啲,我好乖o架,會繼續留喺TVB搏殺,TVB好嘢,希望亞視都加油。」

至於陳法拉懵盛盛不知有利是,不過她謂:「非常好意頭,我哋幫公司賺錢,公司分番畀我哋,公司亦投資多咗拍劇方面,係良性嘅循環。」另外,今年的農曆新年,是法拉首次初一至三都放假,之前更到陽光海灘的地方小休數天。

文:影視組