吳彥祖餐廳誤傳執笠：轉型啫!
吳彥祖（Daniel）有份經營位於銅鑼灣的壽司分店，昨日貼上「營業至2月19日」的告示，惹來結業疑雲，但實情是餐廳將轉型成為一間全新概念日式餐廳，新店擴充至萬呎。踏入蛇年，Daniel生意愈做愈大，有望成為新飲食大亨。
昨日年初五，又適逢情人節，屬新正頭，但昨日有消息指Daniel和Angelababy（楊穎）分別投資的壽司店及Cafe傳出暫停營業，兩人均與《全城熱戀熱辣辣》導演陳國輝合作開設，兩舖位於銅鑼灣一商場地庫，位置亦在毗鄰。昨日所見，兩間店舖同時在門外張貼告示，兩張告示同寫着「本分店將營業至2月19日」字樣，並感謝顧客多年來的支持，惹來結業疑雲，令Fans擔心不已。
兩舖合併
記者致電吳彥祖經理人求證，對方回覆：「唔係結業，餐廳只係轉型啫！做完農曆新年，趁2、3月靜啲，重新裝修，將壽司bar轉位，重新轉型。（轉型後都係做壽司？）賣關子先，到時重開番就知啦！」陳國輝的口徑一致，他指兩間餐廳會轉型變成一間全新概念的日式餐廳，他說：「地庫兩間店都係同一集團，會開一個新概念日式餐廳，因為搵唔到地方開，所以喺呢度開，將兩間餐廳合併成為一間。廚房大啲，洗碗都唔使分兩邊洗。（新餐廳Daniel都有份？）有。（Baby有冇份？）冇，不過5、6月會喺第二度再開另一間Cafe新版本，喺英國請咗個廚師返嚟，餐牌會加啲新菜式。」
擴充萬呎
陳國輝又稱銅鑼灣兩間分店本身有錢賺，但認為新概念店將可以賺更多，預計新概念店三月初開幕。他指很早已決定轉型，所有股東亦知道，兩間餐廳的員工大部分都會留用，部分則調到其他分店繼續工作。
據知，全新概念日式餐廳，面積過萬呎，由於可沿用兩間店的冷氣和水電，故轉型重新裝修只投資數百萬裝修。該集團亦表示日後若有合適舖位，壽司店和Cafe亦會再開分店，目前位於旺角和尖沙咀的分舖會照常營業，可見Daniel的飲食生意愈做愈大，Lisa S.腹中的蛇女認真旺他。
文：名人組